Amantoǵaıdan burylyp, Arqalyqqa qaraı bet alyp baramyz. Sálden soń aldymyzdan Keıki batyrdyń kesenesi kórinip qalýǵa tıis. Tasty aýyldyq okrýginiń shekarasyna ilikkenimiz sol edi, kólik tizgininde otyrǵan Jarqyn esimdi jigit aǵasy júrisin kilt tejep, kúre joldyń oń qaptalyndaǵy asfalttalǵan ashyq alańnyń arǵy betine tirelip toqtady.
– Bel jazyp alaıyq, tómenirekte bulaq bar, sýy bal tatıdy. Qalasańyzdar, anaý turǵan zormannyń eskertkishine baryp, sýretke túsýge bolady, estelik bolyp qalady ǵoı, asyqpańyzdar.
Esimin bilip qoıǵandaı-aq eken, adamǵa baýyr tartyp turatyn aqjarqyn minezdi júrgizýshi kúlimdegen qalpy kóliginiń artqy esigin ashyp, júksalǵyshynan aýzy túıilgen qara paket alyp shyqty. Endi ǵana baıqadyq, anadaı jerdegi bir túp bozqaraǵannyń qalqasynda qabyrǵasy yrsıyp aryp-ashqan ala tóbet jatyr eken. Jarqyn álgi paketti sol ıttiń aldyna aparyp aqtara saldy.
– «Iesiz ıen dalada júrgen bul ne tóbet?» dep turǵan bolarsyzdar.
Janymyzdaǵy semiz áıeldiń «Qańǵyǵan buralqy ıt emes pe, ony qaıtesiń, keteıik tezirek!» degenin estimegendeı syńaı tanytqan júrgizýshi sózin ári sabaqtady. – Shynymdy aıtsam, bul ıttiń bul jerde qashan, qalaı paıda bolǵanyn ózim de bilmeımin. Osy jerde júrgenine birneshe jyl boldy. Keıbir jurt ári-beri ótkende ádeıi toqtap, osylaı tamaq tastap ketedi. Mańaıdaǵy malshylar birneshe ret baılap alyp ketip, asyramaq bolǵan desedi. Qaıtyp osy bulaqtyń basyna qashyp kele beredi eken. Keıde bul bir ótip bara jatqan kólikterdiń birinen qalyp qoıǵan ıt pe eken degen oı keledi. О́ıtkeni mashına qaı jerge toqtasa, sol jerge jaqyndap barady. Shamasy, ıem kórinip qala ma eken dep úmittenetin sııaqty. Áıteýir áldekimdi izdeıtini, kúder úzbeı bireýdi kútetini anyq. Jańa sizder túsip jatqanda da syrttaryńyzdan qalt etpeı qarap baǵyp turdy ǵoı. Iesi ádeıi tastap ketti me, álde bir baqytsyzdyqqa ushyrap kele almaı qaldy ma, kim bilsin?...
Kólikke kóńilsiz bolyp mindik. Jarqyn da bastapqydaı emes, júzinde jaıdarylyqtyń izi de qalmaǵan. Arqalyqqa jetkenshe eshkim jarytyp áńgime aıtpady. Árkim óz oıymen áýre.
Erteńinde bireýler: «Buryn ol jerde dámhana bolǵan. Sodan qalǵan ıt shyǵar» degen boljam aıtty.
Arqalyqtan keri qaıtqanda basqa kólikke mindik. Mýzykasyn aıǵaılatyp qoıǵan jas júrgizýshi álgi avtoturaqqa toqtamaı óte shyqty. Terezeden tóbet jatqan jaqqa úńilip edim, zorman eskertkishin ǵana kózim shalyp qaldy. Tas tuǵyrdyń ústinde zorman emes, ıt otyrǵandaı bolyp kórindi.
Qostanaı oblysy