Túrkistan oblysy Otyrar aýdanynda balabaqsha kúzetshisi bastaýysh synypta oqıtyn birneshe qyzdy zorlady degen kúdikke ilindi, dep habarlaıdy Egemen.kz.
"Otyrar" telearnasynyń jazýynsha, oqıǵa jaz mezgilinde bolǵan. Zorlyq kórgen qyzdardyń aldy 7 jasta.
Jábirlenýshi qyzdardyń biriniń anasynyń aıtýynsha, 33 jastaǵy kúdikti kórshi turady ári aǵaıyny bolyp keledi. Bul týraly jergilikti turǵyn 17 qazan kúni túski ýaqytta habardar bolǵan. Qyzyn dereý dárigerge kórsetip, keıin polısııaǵa shaǵym túsirgen.
«Aýrýhanaǵa baryp, tekserttim. Aldymen rasymen sondaı jaǵdaı boldy ma? Kóz jetkizip alaıyn dedim. Bári aıdan anyq kórinip tur. Tek men emes, birneshe qyzdy zorlaǵany anyq… Meniń qyzym 7 jasta», dedi jábirlenýshi qyzdardyń biriniń anasy.
Túrkistan oblystyq Polısııa departamentiniń bastyǵy Murat Qabdenovtiń habarlaýynsha, qazirgi tańda eki turǵyn aryz jazǵan. Soǵan sáıkes sotqa deıingi tergeý amaldary júrgizilýde.
«Arnaıy jedel-tergeý toby quryldy. Qylmystyq kodekstiń 120-baby 4-bóligi «zorlaý» boıynsha qylmystyq is qozǵaldy. Barlyq mán-jaıdy anyqtaý úshin qajetti is-sharalardyń barlyǵy júrgizilýde. Jedel-izdestirý is-sharalary barysynda qylmys jasady degen kúdikpen Otyrar aýdanynyń turǵynyn ustap, birden qamaýǵa aldyq. Er adam óz kinásin moıyndady. Qazirgi ýaqytta tergeý amaldary jalǵasýda. Tıisti saraptamalardyń barlyǵy taǵaıyndalǵan», dep jazdy jeli paraqshasynda PD bastyǵy.
Bul istiń tergelý barysyn vedomstvo basshysy óz baqylaýyna alyp otyr.
Túrkistan oblystyq bilim basqarmasynyń málimetinshe, kúdikke ilingen er adam jekemenshik balabaqshada jumys istep kelgen. Osy jaıttan keıin oǵan qatysty akt túzilip, jumystan shyǵarylypty.
«Qyzdyń anasy Otyrar aýdandyq polısııa bólimine aryzdanǵan. Bilim salasynyń ókilderi men psıholog mamandar tikeleı jumys júrgizilýde. Oqıǵa jazǵy kanıkýl kezinde bolǵan. Búgin bala quqyqtary jónindegi óńirlik ýákil oqýshy men ata-anasyna psıhologııalyq-quqyqtyq qoldaý sharalaryn júrgizdi. Is jeke azamattardyń máselesi bolǵandyqtan tergeý barysy men qazirgi tańdaǵy prosessti anyqtaý múmkindigi joq ekenin málimdeımiz» delingen bilim basqarmasynyń málimetinde.