Pavlodarda shahmattan «Pavlodar Open» halyqaralyq týrnıri bastaldy. Bul jarysqa jýyqta Dohada ótken dúnıejúzilik básekede álemniń úzdik shahmatshylarynyń biri Magnýs Karlsendi jeńgen pavlodarlyq Álisher Súleımenov te qatysyp jatyr.
«Pavlodar Open» – 2023» týrnıri Qazaqstan, Reseı, Belarýs, Ýkraına, Nıderland, Aýstralııa, Úndistan, Izraıl, Ázerbaıjan, Tájikstan jáne Bangladeshten kelgen 230 shahmatshynyń basyn qosty. Onyń ishinde 64 halyqaralyq deńgeıdegi sportshylar men grossmeısterler bar. Atap aıtqanda, «Qatar Masters Open» halyqaralyq týrnırinde sensasııalyq jeńiske jetken Álisher Súleımenov, eki dúrkin olımpıada chempıony jáne Eýropa chempıony Aleksandr Moıseenko, Nıderland pen Eýropanyń úsh dúrkin chempıony Sergeı Tıvıakov jáne Úndistan birinshiliginiń qola júldegeri Setýraman syndy myqtylardyń atalǵan týrnırge qatysýy – úlken mártebe.
Halyqaralyq grossmeıster Petr Kostenko aıtyp ótkendeı, oılylar týrnıri FIDE reıtıngi boıynsha eki seksııaǵa bólindi. A seksııasynda kemi 2000 jáne odan joǵary upaı jınaǵandar baq synasa, al odan tómen ornalasqandar B tobynda óner kórsetedi. Jarys favorıti retinde reıtıngtegi qorjynynda 2608 upaıy bar reseılik Anton Demchenko tanylyp otyr. Týrnır 31 qazanǵa deıin jalǵasady. Jalpy júlde qory – 23 mln teńgeni qurasa, A tobynda jeńiske jetken sportshyǵa 4 mln teńge aqshalaı júlde beriledi.
Aıtyp óteıik, búginde Pavlodar óńirinde 30 myńnan astam adam shahmatpen aınalyssa, oıyndy úıretý óńirdiń barlyq mektepterinde uıymdastyrylǵan.
PAVLODAR