Qazaqstan shahmat federasııasy «Freedom Broker» kompanııasynyń demeýshiligimen «Shahmat kerýeni» jobasy aıasynda el aralap júr. Dál Respýblıka kúni kerýen Oral qalasyna at basyn tirep, oılylar oıynnyń óńirdegi úzdikterin anyqtady.
Qazaqstan shahmat federasııasy prezıdentiniń keńesshisi Oleg Rıabchenkonyń aıtýynsha, bul joba elimizde ıntellektýaldy sport túrin damytý, keńinen nasıhattaý úshin qolǵa alynǵan. Joba boıynsha «Shahmat kerýeni» eki aı ishinde 14 myń shaqyrym jol júrip, el aımaǵyn túgel aralap, 10 qarasha kúni Túrkistanǵa taban tireıdi. Ár oblystyń úzdikterinen quralǵan 60 oıynshy ózara básekege túsip, grand-fınaldyń jeńimpazy 5 mln teńge júldege ıe bolmaq. Kerýenniń jalpy júlde qory – 16 mln teńge.
– Bul jarysqa ádeıi áýesqoı shahmatshylardy ǵana qatystyryp otyrmyz. О́ıtkeni shahmat sekildi ıntellektýal oıyny elimizde jalpyhalyqtyq sıpat alǵanyn qalaımyz, – dedi Oleg Rıabchenko.
«Shahmat kerýeni» jobasynyń Oraldaǵy kezeńin Batys Qazaqstan oblysynyń ákimi Narıman Tóreǵalıuly ashty.
– Elimizde halyqaralyq Elo reıtıngine kiretin 900-deı sportshy bar. Onyń 15-i – halyqaralyq grossmeıster ataǵyna ıe. Al bizdiń oblysta 9 myńdaı adam shahmatpen júıeli túrde aınalysady. №2 balalar men jasóspirimder sport mektebinde, Mektepten tys jumystar ortalyǵynda, Oqýshylar saraıynda, sondaı-aq Aqjaıyq, Báıterek, Bórli, Terekti, Qaztalov aýdandarynda shahmat úıirmeleri jumys istep tur. Onda 500-deı bala bar. О́ńirde joǵary bilikti 20 jattyqtyrýshy-ustazymyz sabaq beredi. О́ńirde el namysyn qorǵap, kásibı mansabynda joǵary jetistikterge qol jetkizgen, balalar úlgi tutatyn, elikteıtin shahmatshylar az emes. Solardyń ishinde halyqaralyq grossmeıster, jazǵy Azııa oıyndarynyń jeńimpazy Murtas Qajyǵalıev, jasóspirimder arasyndaǵy álem chempıonatynyń qola júldegeri Álibek Iǵambergenov, 20 jasqa deıingi jastar arasyndaǵy el chempıony Janat Saıyn, 20 jasqa deıingi qyzdar arasyndaǵy Qazaqstan chempıonatynyń kúmis júldegeri Aısezim Muhıt, 16 jasqa deıingi uldar arasyndaǵy «Aktau Chess Open» ashyq týrnırinde qola júldeger atanǵan Aleksandr Savın, el Respýblıkasy balalar kýboginiń jáne jasóspirim qyzdar arasyndaǵy el chempıonatynyń kúmis júldegeri Laýra Ábdildaeva bar, – dedi N.Tóreǵalıev.
Osy kúni Oraldaǵy tuńǵysh Prezıdent alańynda uıymdastyrylǵan merekelik is-shara kezinde Qazaqstan shahmat federasııasynyń oblystyq fılıaly ashylyp, onyń tóraǵalyǵyna Oral qalasynyń ákimi Mırjan Satqanov taǵaıyndaldy.
Osy is-sharaǵa oraı arnaıy qurylǵan mobıldi kıiz úıde shveısarlyq júıe boıynsha 11 kezeńnen turatyn blısten týrnır ótti. Onda oblystyq irikteýden shyqqan 20 adam ózara baq synap, úsh jeńimpaz 10 qarasha kúni Túrkistanda ótetin grand-fınalǵa joldama aldy. Olar – Tórehan Molbaı (1-oryn, 100 myń teńge), Dmıtrıı Danılov (2-oryn, 50 myń teńge), Mıras Rýshanov (3-oryn, 30 myń teńge).
– Men shahmatty 4 jasymda ákemnen úırendim. Sodan beri turaqty aınalysyp kelemin. Búgin týrnırde oblystyń 20 myqtysymen oınap, 1-oryn ıelendim. О́zimniń jetken jetistigime qýanyp turmyn, – dedi kıeli Túrkistanda ótetin fınalǵa joldama alǵan 15 jastaǵy Tórehan Molbaı.
Týrnırde Aısha Tursynova «Qyzdar arasyndaǵy úzdik kórsetkish», Beksultan Ǵubashev «16 jasqa deıingi úzdik oıynshy», Taıyr Jumabaev «50 jastan asqan ardager qatysýshy» atalymdary boıynsha marapattalyp, árqaısysyna 30 myń teńgeden aqshalaı syılyq tabys etildi.
Is-shara aıasynda aldyn ala tirkelgen 10 áýesqoı oıynshy shahmat olımpıadalarynyń jeńimpazy, el chempıony Roman Kozlovpen bir mezettik oıyn seansyna qatysty.
Batys Qazaqstan oblysy