Jańadan qurylǵan oblys úshin ınvestısııa tartýdyń qanshalyqty mańyzdy ekenin aıtyp jatýdyń ózi artyq. Shyny kerek, oblysta jańa óndiris oryndaryn ashý aýadaı qajet dúnıe bolyp tur. Bul degenińiz – qosymsha qarjy kózderi, jańa jumys oryndary ekenin aıtpasa da túsinikti.
Oblys basshylyǵy óńir ekonomıkasyna jańa lep ákeletin jobalardy qoldaýǵa daıyn. Biraq sonyń jolyn tabýdyń ońaıǵa túspeı jatqany da ras. Degenmen aımaqqa oblys qurylǵannan bergi alǵashqy sheteldik ınvestorlar da kele bastady. Olardyń usynǵan jobasy halyqtyń da kóńilinen shyqty.
Mysaly, Jezdi kentinde kremnıı zaýytyn salýǵa qytaılyq kásipkerler Shao Hanmıng pen Mı Rong qatysýǵa nıet tanytty. Mundaǵy jobanyń jalpy quny 7,5 mlrd teńgeni quraıtyn bolsa, qytaılyq kompanııa osynyń 20 paıyzyn quıýdy kózdep otyr. Qalǵan qarajatty ózimizdiń kásipkerler kóteredi. Jańa zaýyt iske qosylǵanda 200 jumys orny ashylmaq. Qytaı jaǵynan 40 shaqty maman shaqyrylady. Olar – osy zamanǵy tehnologııanyń tilin meńgergen mamandar.
Ekijaqty áriptestik aıasynda ashylatyn zaýyt ekologııaǵa da basa mán bermek.
– Biz jergilikti halyqtyń alańdaýshylyǵyn jaqsy túsinemiz. Sondyqtan zaýytta súzgileý, ıaǵnı fıltrleý júıesi ornatylady, shań, tozań syrtqa shyqpaıdy,– dep sendirdi qytaılyq kompanııa ókilderi kent turǵyndaryna zaýytty tanystyrý barysynda. Zaýyt jospar boıynsha 2024 jyldyń tamyzynda paıdalanýǵa beriledi.
Otandyq «TehnoGrýppServıs» JShS men qytaılyq «Sinohydro Engineering Bureau Machinery and Equipment Co.Ltd» kompanııasynyń birlesken eki jobasy Ulytaý oblysyndaǵy jasyl energııa óndirisine baǵyttalǵan.
Jýyrda oblys ákimi Berik Ábdiǵalıuly atalǵan eki kompanııa basshysymen úshjaqty memorandýmǵa saltanatty túrde qol qoıdy.
Jalpy quny 489 mlrd teńge kólemindegi ınvestısııalyq jobalardyń biri – jel energııasyn óndiretin stansa bolsa, al ekinshisi – osyndaı stansalarǵa qajetti munara óndiretin zaýyt bolmaq.
– Biz eki jobany da tolyq qoldap, qýattap otyrmyz. Sondyqtan stansa ornatý úshin oblystyń Jańaarqa aýdanynan 20 myń gektar, al zaýyt salý úshin Jezqazǵan mańynan 20 gektar jer bóldik. Stansa 3,4 mlrd kılovat energııa óndiredi. Bul bizdiń qajetimizdi tolyqtaı qamtamasyz etedi. Arzan energııaǵa qol jetkizemiz. Eger múmkindigi kelip jatsa, artyq energııany elimizdiń basqa óńirlerine jetkizbekpiz, – dedi oblys ákimi úshjaqty memorandýmǵa qol qoıý rásimi kezinde.
«Sinohydro Deputy» kompanııasynyń dırektory Jı Jen Veı jel stansasy men zaýyttyń Ulytaý oblysynyń ekonomıkasyn kóterýge ózindik úlesi bar jobalar ekenin atap ótti. Seriktesiniń sózin «TehnoGrýppServıs» kompanııasynyń jetekshisi Jomart Momynbaev odan ári naqtylaı tústi.
– «Sinohydro Deputy» kompanııasy – álemdik naryqta jasyl energııa salasyndaǵy áıgili kompanııa, tájirıbesi mol.Sondyqtan mundaı kompanııamen serikteske aınalý, birlesken jobany júzege asyrý múmkindigi týǵanyna qýanyshtymyz. Jezqazǵanda salynatyn zaýyttyń elimizde balamasy joq. Joba boıynsha zaýyt jylyna 100 munara shyǵarady. Al onyń qýaty 500-600 megavatqa jetedi, – dedi ol.
Aýqymdy jobalardy iske asyrý 2024 jyldan bastalady. Jobalar tolyqtaı paıdalanýǵa berilip, iske asqan kezde oblysta jańadan 300 turaqty jumys orny paıda bolmaq.
Ulytaý oblysy