Torǵaıdaǵy Álibı Jangeldın tarıhı-memorıaldyq murajaıynda «Qasıetti Qazaqstan» kórmesi ashyldy. Táýelsiz elimizdiń toqsanynshy jyldardan beri qaraıǵy derbes memleket bolyp qalyptasý, órleý, damý tarıhyn baıandaıtyn hronologııalyq fotoekspozısııa alty bólimnen turady.
0 jyly 25 qazanda qabyldanǵan Egemendik deklarasııasynyń kóshirmesi, 1993 jylǵy alǵashqy Ata zańymyz, Qazaqstannyń geografııalyq kartasy, Memlekettik Týymyz, Eltańbamyz, sondaı-aq, táýelsizdigimizdi birinshi bolyp tanyp, moıyndaǵan baýyrlas Túrkııa eliniń memlekettik nyshandary qoıylǵan.
Bıyl aınalymǵa engenine 30 jyl tolyp otyrǵan tól teńgemizdiń tarıhy da kórme tórinen oryn alyp otyr.
«Tól teńgemizge alǵash qol qoıǵan jerlesimiz, belgili ekonomıst-ǵalym, Qazaqstan Ulttyq bankiniń tuńǵysh tóraǵasy Ǵalym Baınazarov aǵamyz kezinde óz qolymen ákelip mýzeıge tartý etip ketken ulttyq valıýta úlgileri men altyn qalamy da osy kórmeniń aıasynda kópshilik nazaryna usynylyp otyr. Sonymen birge bizdiń ekspozısııada Qazaqstan Qarýly kúshteri, elimiz múshelikke engen halyqaralyq uıymdar týraly málimetter bar», deıdi mýzeı kesheniniń basshysy.
Kórmede, sonymen qatar, elordamyz – Astana qalasynyń qurylys-sáýlet tarıhy týraly fotoderekter, Memleket basshysy Qasym-Jomart Toqaevtyń Respýblıka kúnine ulttyq mereke mártebesin qaıtarý týraly Jarlyǵynyń kóshirmesi, Alash ardaqtylary Álıhan, Ahmet, Mirjaqyp atalarymyzdyń portretteri, «Qasıetti Qazaqstan» ensıklopedııalyq jınaǵynyń tórt tomy aıshyq tapqan.
Torǵaı murajaılar kesheniniń dırektory Gúlbaný Sársekeıdiń aıtýynsha, Qostanaı oblysynyń kıeli nysandary «Qasıetti Qazaqstan» kóptomdyq jınaǵynyń úshinshi tomyna engen. Munda Jangeldın aýdanynda ornalasqan 7 kıeli nysan, sonyń ishinde Alash qaıratkeri Mirjaqyp Dýlatulynyń kesenesi de bar.
Atalǵan kórme jyl sońyna deıin jumys isteıtin bolady. Oǵan deıin mýzeı ujymy aýdandyq bilim bólimimen birlesip, mektep oqýshylaryna arnalǵan tárbıelik-tanymdyq sabaqtar ótkizýdi josparlap otyr.
Qostanaı oblysy