Qara joldan keletin qasiret azaıar emes. Birneshe aı buryn polısııa departamenti JPQB jol júrisin qadaǵalaýdy uıymdastyrý tobynyń erekshe tapsyrmalar jónindegi aǵa ınspektory, polısııa podpolkovnıgi Bolat Izbasarov bıylǵy jeti aıda óńirde tirkelgen jol-kólik oqıǵasynyń sany 35,9 paıyzǵa kemigenimen, ajal qushqan jasóspirimder sany 46,2 paıyzǵa artqanyn aıtyp, dabyl qaqqan edi.
Shynynda da, jol-kólik oqıǵasy saldarynan baqılyq bolǵan azamattardyń sany jyl ótken saıyn artyp barady. Ereje buzǵan júrgizýshilerdiń kesirinen talaı adam ómirmen qosh aıtysyp, ondaǵan otbasy tireginen aıyryldy. Jambyldyq polısııa qyzmetkerleri ár onynshy jol-kólik oqıǵasy júrgizýshilerdiń kólik rýlin basqarý kezinde uıyqtap ketýi saldarynan bolatynyn aıtyp otyr.
Avtokólik júrgizýshilerin bylaı qoıǵanda, moped, skýter jáne samokat tizgindegen azamattar da jol qozǵalysy erejesin óreskel buzyp jatyr. Derekke kóz júgirtsek, moped tizgindegen turǵyndardyń qatysýymen bolǵan jol-kólik oqıǵasy saldarynan bir adam qaza taýypty. О́zekti órteıtin ókinish te osy.
«Reıd barysynda oblys ortalyǵynda polısııa qyzmetkerleriniń qatysýymen 87 moped pen skýter júrgizýshisi ákimshilik jaýapkershilikke tartylyp, 45 motokólik aıypturaqqa qoıyldy. Bir sózben aıtqanda, jol qozǵalysy erejesin óreskel buzatyn jas ta, jasamys ta azaımaı tur. Kóliktiń osy bir túrin kóbine 16 jastaǵy kámeletke tolmaǵan jasóspirimder paıdalanatynyn aıta ketken jón. Olardyń ata-analary ákimshilik jaýapkershilikke tartyldy, profılaktıkalyq áńgimeler júrgizildi», deıdi oblystyq polısııa departamenti bastyǵynyń birinshi orynbasary Qurmet Májikenov.
Polısııa departamenti ókili keltirgen derekke súıensek, jyl basynan beri motokólikterdiń qatysýymen tirkelgen jol-kólik oqıǵasynyń sany edáýir artqan. Al moped júrgizýshileriniń qatysýymen tirkelgen jol-kólik oqıǵasynyń sany 11-ge jetken eken. Saldarynan bir adam qaza bolsa, on úsh adam túrli dárejede jaraqat alypty.
«Moped jáne skýter júrgizgen balalardyń qatysýymen 10 jol-kólik oqıǵasy tirkelip otyr. Saldarynan bir bala ómirmen qosh aıtyssa, toǵyz bala jaraqat alǵan. Máselen, taıaýda ǵana kámelet jasyna tolmaǵan skýter júrgizýshisi qarsy baǵyttaǵy qozǵalys jolaǵyna shyǵyp, «Range Rover» markaly avtokólikpen soqtyǵysty. Jol-kólik oqıǵasy saldarynan skýter júrgizýshisi oqıǵa ornynda qaıtys boldy. Árıne, mundaı ókinishti jaǵdaılar kimdi de bolsa oılandyrsa degen tilek bar», deıdi máselege jan-jaqty toqtalǵan Q.Májikenov.
Polısııa departamenti bastyǵynyń birinshi orynbasarynyń aıtýynsha, ata-analar balalaryna qymbat syılyqty tartý etkenimen, onyń arty nemen aıaqtalatynyna nazar aýdarmaıdy. Al balalar jol qozǵalysy erejesin bilmeıdi. Osynyń kesirinen jasóspirimderdiń qatysýymen bolatyn qaıǵyly oqıǵalar sany kemimeı otyr.
«Kóbine jasóspirimder jol erejesin múldem bilmeı jatyp kólik tizgindeıdi. Eń ókinishtisi de osy bolyp tur. Ata-analar balasyna qymbat syılyq syılaýǵa qushtar bolǵanymen, onyń saldary týraly oılaı bermeıdi. Jasóspirimderdiń qaýipsizdigine bas aýyrtpaıtyny basty ári ózekti máselege aınaldy. Úlkender skýter, moped tipti velosıped te kólik quraldaryna jatatynyn umytpaǵany jón. Keıde osy kólik quraldarynyń qatysýymen bolǵan apattardyń saldary qaıǵyly jaǵdaıǵa ákeletinin qaperden shyǵaryp alamyz. Qysqasy, nemquraıdylyqtyń sońy orny tolmas ókinishke aparyp jatyr. Mundaı máseleniń bolmaýyna barlyq tarap múddeli bolýǵa tıis.
Biz motokólik júrgizýshileri jaýapkershilik júgin sezinse deımiz. Qandaı da bir kólikti tizgindegen adam jol qozǵalysy erejesin tolyq bilgeni abzal. Sonda ǵana qaıǵyly jaǵdaılardyń aldyn alatyn múmkindik týmaq. Kámelet jasyna tolmaǵan balalarǵa motokólik ápergen ata-analar máseleniń baıybyna tereńinen úńilgeni abzal. Tipti bala 16 jasqa tolǵanǵa deıin oǵan moped pen skýter satyp áperýdiń eshqandaı qısyny joq. Jolaýshy retinde de osy sanattaǵy kólikpen júrýine ruqsat bermese degen tilegimiz bar. Ata-analar eń birinshi kezekte jasóspirimniń qaýipsizdigine nazar aýdarýy qajet. О́ıtkeni jasóspirim – bir otbasynyń ǵana emes, eliniń de úmiti», deıdi Q.Májikenov.
Álbette, jasóspirimderdiń qatysýymen bolatyn jol-kólik oqıǵasy sanynyń arta túskeni kimdi de bolsa oılandyrmaı qoımaıdy. Bir otbasynyń úmiti men erteńi bolar órimdeı jastyń jol apaty saldarynan baqıǵa attanýy – tragedııa. Bul ótkir máselemen qoǵam bolyp kúresken jón.
Jambyl oblysy