Qazaqstan Úkimeti «Qoljetimdi ınternet» ulttyq jobasyn bekitti. Premer-mınıstr Álıhan Smaıylov tıisti qaýlyǵa qol qoıdy.
Ulttyq joba Memleket basshysynyń respýblıkanyń ınternet salasyn damytý jónindegi tapsyrmalaryn oryndaý maqsatynda qabyldandy. Onyń negizgi maqsaty – halyqty jyldamdyǵy keminde 100 Mbıt/s keń jolaqty ınternetpen qamtý.
«Qoljetimdi ınternet» ulttyq jobasy 2024 jyldan bastap 2027 jylǵa deıingi kezeńdi qamtıdy jáne ony iske asyrýǵa 1,5 trln teńgeden asa qarajat kózdelgen. Aıta ketý kerek, bul somanyń kólemdi bóligi, ıaǵnı 1,3 trln teńgeden astamy – bıýdjetten tys qarajat.
Joba aıasynda aıtarlyqtaı qarajat symdy jáne symsyz baılanys ınfraqurylymyn damytýǵa baǵyttalady. Aýyldyq jerlerde talshyqty-optıkalyq baılanys jelileriniń tarmaqtalǵan júıesin salýǵa basa nazar aýdarylmaq. Máselen, memlekettik-jekeshelik áriptestik tetigi arqyly 3 myńnan asa aýylda tıisti baılanys jelilerin montajdaý josparlanyp otyr.
Jalpy shaǵyn jáne orta baılanys operatorlaryn qoldaý arqyly 400 myń úı sharýashylyǵyna jyldamdyǵy joǵary ınternet tartylady. Jekemenshik operatorlar tarapynan ınvestısııalardyń jalpy somasy 92 mlrd teńge bolǵan jaǵdaıda, onyń jartysyn memleket kúrdeli shyǵyndarǵa sýbsıdııalar túrinde qaıtarady.
Ulttyq joba aıasynda respýblıkalyq jáne negizgi oblystyq avtojoldardy mobıldi ınternetpen qamtý úshin sıfrlyq ınfraqurylym salý josparlanǵan. Atap aıtqanda, 487 antenna-dińgek qurylysyn ornatý josparlanyp otyr. Bul 17 myń shaqyrym avtojoldy mobıldi ınternetpen qamtýǵa múmkindik beredi.
Taǵy bir baǵyt – 5G jelisin odan ári óristetý bolmaq. Búgingi tańda 605 bazalyq stansa ornatylǵan. 2025 jyldyń sońyna deıin 5G tehnologııasyn respýblıkalyq mańyzy bar qalalar men oblys ortalyǵynyń barlyǵyna engizý josparlanyp otyr. Osy jumys aıasyndaǵy baılanys operatorlarynyń ınvestısııalary shamamen 300 mlrd teńgeni quraıdy.
Ulttyq joba aıasynda iri derekter ortalyqtaryn jáne transshekaralyq talshyqty-optıkalyq magıstraldardy salý boıynsha sharalar josparlanǵan. Sondaı-aq respýblıkaǵa jetekshi halyqaralyq IT-kompanııalardy tartý úshin zańnamany ózektendirý qajet.
Jalpy, ulttyq jobany iske asyrý 2027 jylǵa deıin otandastardy jyldamdyǵy joǵary ınternetpen qamtý deńgeıin 100%-ǵa deıin jetkizýge jáne eldiń óńirdegi sıfrlyq hab retindegi pozısııasyn nyǵaıtýǵa múmkindik beredi.