Senat spıkeri Máýlen Áshimbaevtyń tóraǵalyǵymen Palata bıýrosynyń otyrysy ótip, depýtattar 16 qarasha kúni bolatyn Senat otyrysynyń kún tártibin bekitti.
Aldaǵy Palata otyrysynda senatorlar «Qazaqstan Respýblıkasynyń keıbir zańnamalyq aktilerine aqparattyq qaýipsizdik, aqparattandyrý jáne sıfrlyq aktıvter máseleleri boıynsha ózgerister men tolyqtyrýlar engizý týraly» zańdy qaraıdy. Bul zań tıisti saladaǵy zańnamany jetildirýge, sondaı-aq sıfrlyq maınıng jónindegi qyzmetti retteýge arnalǵan.
Zań normalaryna sáıkes Qazaqstan Respýblıkasynyń zańdarynda kózdelgen birqatar qujatty qospaǵanda, jeke basyn kýálandyratyn qujattardyń kóshirmelerin qaǵaz jetkizgishte jınaýǵa, óńdeýge tyıym salý belgilenedi. Sonymen qatar Bıýro otyrysynda Parlament Májilisinen kelip túsken zańdar jumys úshin Senattyń turaqty komıtetterine bólinip berildi.