Astanadaǵy Bolashaq energııasy murajaıynda «QazExpoCongress» ulttyq kompanııasynyń qoldaýymen Koreıa Respýblıkasynyń Qazaqstandaǵy elshiliginiń Koreı etnomádenı birlestigi uıymdastyrǵan dástúrli óneri kórmesi ashyldy.
Kórmege dástúrli mýzykamen sheber úılesken koreı qolóner týyndylary usynyldy. Bul jumystardan koreı halqyna tán ásemdikti, náziktikti, shynaıylyqty kóresiz. Árbir týyndy ulttyq naqyshpen órnektelgen. Sonymen birge kórmege kelýshiler koreı men otandyq ártister daıyndaǵan mýzykalyq qoıylymdy tamashalady. Máselen, Koreıadan kelgen ónerpazdar «phansorı» janryndaǵy vokaldyq qoıylym kórsetip, «sandjo» mýzykalyq stılindegi dástúrli «kaıagym» aspabynda óner kórsetti. Qazaqtyń dástúrli saz aspaptary jetigen men qobyzdyń súıemeldeýindegi eki el ónerpazdarynyń qoıylymyn da jurtshylyq jyly qabyldady.
Mazmundy sharanyń ashylýynda «QazExpoCongress» UK» AQ basqarma tóraǵasynyń orynbasary Sansyzbaı Joldasbaev kórmeniń eki el arasyndaǵy mádenı almasý jyly aıasynda ótip otyrǵanyn jetkizse, elimizdegi Koreıa Respýblıkasynyń Tótenshe jáne ókiletti elshisi Chjo Te-ık «K-Maestro» tamyry tereńnen tartqan dástúrli mýzyka men qolónerdi biriktiretinin atap ótti.
«Búgingi kórmeniń mańyzy óte zor. Sondyqtan osy kórmeni ótkizýge qoldaý kórsetken barlyq azamatqa rızashylyǵymdy aıtamyn. Sondaı-aq «K-Maestro»-da óner kórsetýge Koreıadan Qazaqstanǵa arnaıy kelgen óner sheberleri Lım Chjeın, Chjı Arym, Choı Chjeıonge erekshe qurmetimdi bildiremin», dedi elshi.