Tanymal bloger, bıznes trener Balqııa Baltabaı Arys qalasynda úlken meshit salýǵa bastamashy boldy, dep habarlaıdy Egemen.kz.
Ol áleýmettik jelidegi paraqshasynda osydan eki jyl buryn 6 qarashada 2000 adamdyq úlken meshittiń qurylysy bastalǵanyn jarııalaǵan.
Meshit janynan 2021 jyly qyzdarǵa arnalǵan medreseniń de qazyǵy qaǵylǵan. Al 2022 jyly uldarǵa arnalǵan medrese qurylysy bastalypty. Osylaısha, eki jyl ótken soń meshit pen medrese qasynan taǵy túrli qyzmettegi birneshe ǵımarat boı kóterip otyr.
Balqııa Baltabaı buǵan deıin toıǵa jınalǵan 20 mıllıon teńgeni meshitke tabystaıtyndaryn da aıtqan edi. Sondaı-aq, quny 50 mıllıon turatyn Toyota Land Cruiser 300 kóligin de meshit qurylysyna atapty.
"Qurylysyna 2,5 mıllıard teńge jumsaldy. Kásipkerlerdiń, demeýshilerdiń qoldaýymen, halyqtyń birligimen qazaq eline taǵy da bir meshit. 2000 adamdyq meshit jáne uldar medresesi, qyzdar medresesi, sport kesheni, meıramhana, ustazdar úıi - 6 birdeı ǵımarattyń ashylýy bolady. Bas múftıdiń ózi kelip ashady", - dep jazdy ol paraqshasynda.
Al búgin sol alty ǵımarattyń resmı ashylý saltanaty ótti. Bir mezette 2000 adam qulshylyq jasaıtyn meshittiń ashylý saltanatyna Qazaqstan musylmandary dinı basqarmasynyń tóraǵasy, bas múftı Naýryzbaı qajy Taǵanuly, Arys qalasynyń ákimi Gúljan Qurmanbekova, meshit salýǵa atsalysqan kásipkerler men aqsaqaldar jáne qala turǵyndary qatysqan.
Jańa meshittiń minájat zaly 1500 sharshy metr bolady. Al qurylys sáýleti ulttyq naqyshpen árlengen.
Jańa meshitke dinı basqarmanyń sheshimimen "Háziret Ábý Bákir ás-Syddyq" ataýy berilip, Bas múftıdiń buıryǵymen Berik Úısinbaev ımam bolyp taǵaıyndalǵan. Meshittiń ashylýyna bas múftı Naýryzbaı qajy Taǵanuly arnaıy kelgen.
"Meshittiń taǵy bir ereksheligi munarasy Mádınege, qubylasy Mekkege baǵyttalypty. Úsh qabattan turatyn meshitte bir mezette 2 myń adam qulshylyq ete alady. Munda úlken zalǵa ilingen lıýstrada 99 jaryqsham qoıylǵan. Bul Allanyń 99 esimine oraılastyrǵan. Budan bólek, munda konferensııa zaly, kitaphanasy, dárishanalar, bir úlken áıelder zaly, neke jáne ımamdar bólmesi bar. Sonymen qatar, 100 avtokólikke arnalǵan avtoturaqqa oryn bólingen. Meshit aýmaǵynda 150 kisige arnalǵan ashanasy da qarastyrylǵan", - deıdi Balqııa Baltabaı.
Meshittiń soǵylýyna demeýshi bolǵan Balqııa Baltabaı salmaǵy 9 tonnaǵa jýyq bolatyn, qoı júninen toqylǵan kilemdi Túrkııadan arnaıy aldyrtqanyn jetkizdi.
Jeli qoldanýshylary onyń isine jyly lebizderin jazǵan.