Tálimi mol ákeler forýmy

Forýmda bala tárbıesindegi ákeniń róli týraly áńgimeler men pikirler ortaǵa salyndy. «Arbanyń aldyńǵy dońǵalaǵy qaıda júrse, sońǵysy sonda júredi» degendeı, ákeniń minezi, daǵdysy bala boıyna sińiriletini týraly dálelder aıtyldy.

«Eger áke mádenıetti bolyp, ózin rýhanı baı tulǵa retinde kórsete bilse, balanyń boıyna da sol úlgi egiledi. Syrtqy kúsh pen ortanyń áseri qansha kúshti bolsa da, bala aldymen ózi jaq­sy kóretin ákeniń qasıetin boıyna eriksiz sińiredi», dedi fo­rýmda sóz sóılegen baıyrǵy ustaz, qalalyq aqsaqaldar al­qa­sy­nyń tóraǵasy Jangeldi Tájın.

Jalpy, jıynnyń maqsa­ty – qoǵamda ata-ananyń, áke­niń bedeli men belsen­di­ligin art­tyrý, bala tárbıesin­degi rólin kúsheıtý, otbasy qundy­lyqtaryn nasıhattaý, bala qu­qyǵy, bilimi, densaýlyǵy, qaýip­sizdigi sııaqty ózekti má­se­lelerdi talqylaý. Jıyn­da oblystyq bilim basqarmasynyń basshysy Nazir Jáshibekov, «Senimen bolashaq» RQB qu­ryltaıshysy Nurken Asanov, ardager ustaz, M.Qozybaev atyn­daǵy Soltústik Qazaqstan ýnı­versıtetiniń psıhologııa­lyq qyzmetiniń basshysy Pavel Moıseev, Ákeler odaǵy oblys­tyq fılıalynyń tóraǵasy Ev­genıı Maksımov, Ulttyq ulan akademııasynyń mo­ral­­­­­dyq-psıhologııalyq qam­­ta­ma­­­syz etý sıkliniń bas­tyǵy, pol­­­­kovnık Arhat Táttim­betov qa­ty­­syp, sóz sóıledi. So­­­ny­men birge belsendi áke­ler, oblys ákimi janyndaǵy áıel­der iste­ri jáne otbasylyq-demogra­fııa­lyq saıasat jónindegi komıssııa músheleri, oblystyq bilim berý uıymdarynyń ata-analar komıteti men qamqor­shylyq keńes músheleri, psıhologter men pedagogter, zań­gerler, BAQ ókilderi boldy. Oblystyq ardagerler uıy­my­nyń tóraǵasy Eskendir Eleýsi­zov te bala tár­bıesindegi ákeler róline toq­talyp ótti.

Byltyr «Senimen bola­shaq» RQB oblystyq bilim bas­qarmasymen yntymaqtastyq týraly memorandýmǵa qol qoıǵan edi. Forým osy ynty­maqtastyq jumystar aıasynda birlesip ótkizildi. Is-sharanyń ekinshi bóliminde jas ákelerge arnal­ǵan semınar-trenıng uıym­dastyryldy. Oblystaǵy bilikti psıholog mamandar «Ba­lanyń ómirindegi – áke: onyń róli men áseri» atty seksııada bóli­nip dáris oqydy. Is-sharany «Qazaq tili» qoǵamy oblystyq fılıalynyń tóraǵasy Janat Muhamedjanov ashyp, júrgizip otyrdy. Jıyn barysynda qa­ladaǵy Ermek Serkebaev atyn­daǵy daryndy balalarǵa ar­nalǵan mektep pen oblystyq fı­larmonııanyń ónerpazdary mýzykalyq qoldaýlar kórsetti. Osynyń ózi jaıshylyqta tek sóz aıtylatyn qalypty konferensııalardan erekshe bolyp, tyńdarmandardy sharshatpaı, sergek otyrýyna sep boldy. Is-sharaǵa oblystyń qoǵam belsendileri, qala mektep­teri­niń muǵalimderi, ýnıversıtet pen kolledj oqytýshylary, ata-analar, stýdentter men oqý­shylar qatysty.

Petropavl