Bul kúnderi soltústikte aýa raıy qubylyp tur. 18 qarashada qalyń qar túsip, kún -15 gradýsqa deıin sýytqan bolatyn. Ertesine qatty daýyl turyp, jeldiń jyldamdyǵy sekýndyna 28, keı jerlerde tipti 30 metrge deıin bardy. Artynsha aýa raıy jylymyq tanytyp, qar aralas jańbyr jaýa bastady. Ekpindeı soqqan sýyq jel elektr jelilerin qatyryp, keı jerlerde elektr qýatyn berý toqtatyldy. Ásirese Maǵjan Jumabaev aýdanynda kúrdeli ahýal qalyptasty. Munda joǵary voltti VL-110 kv elektr baǵandaryna zaqym kelip, daýylǵa shydas bermeı, qulap ketkenderi de bar. Basqa aýdandardaǵy jaǵdaı da máz emes. Elektr jaryǵyn óshirýge týra kelgen soń 183 aýyldyq eldi meken jaryqsyz qaldy...
Oblys ákimi Ǵaýez Nurmaǵambetov jaǵdaıdy baqylaý jáne túzetý úshin jedel shtab qurylǵanyn aıtty. Onyń aıtýyna qaraǵanda, qazir elektr qýatyn beretin rezervtegi generatorlar iske qosylyp, áleýmettik salanyń ǵana nysandaryna tok berilgen. Al jylý esh kidirissiz berilip jatyr.
Sonymen qatar tótenshe jaǵdaılarǵa baılanysty eki eldiń arasyndaǵy yntymaqtastyq týraly kelisimniń sheńberinde Reseıden ýaqytsha elektr qýaty alynatyny aıtyldy. Qalǵanyn Aqmola oblysynyń «Kókshetaý-Energo» JShS qamtamasyz etýge kelisilgen. Búgingi tańda osy kásiporynnyń jóndeý brıgadalary jumys istep, Taıynsha, Aıyrtaý, Ǵ.Músirepov aýdandarynyń 10 eldi mekenine elektr qýatyn jetkizý jumystaryn júrgizip jatyr.
Oblystaǵy elektr qýatyn jetkizetin júıeniń bári – «Sevkazenergo» aksıonerlik qoǵamyniki. Qazir olardyń 46 jóndeý brıgadasy jumys isteýde. Olar elektr qýaty sónip qalǵan 30 eldi mekenniń jelilerin jóndeýmen aınalysyp jatyr. Sonymen birge Ǵ.Nurmaǵambetov búgingi tańda áli 40 eldi mekenge toq shekteýli kólemde ǵana jetkizilip otyrǵanyn da aıtyp ótti.
Oblystyń energetıka jáne turǵyn úı-kommýnaldyq sharýashylyǵynyń basshysy Vladıslav Lýkın turǵyndardy aýyz sýmen qamtamasyz etetin «Esil sý» kompanııasynyń fılıaly turaqty jumys istep turǵanyn jetkizdi. Sonymen birge ol elektr jelileri men jaraqtar «Sevkazenergo» AQ bolǵandyqtan, jóndeý jumystaryna bıýdjet qarajaty bólinbeıtinin aıtty. «Osyndaı jaǵdaıǵa jalǵyz jelini qatyrǵan qarly-jańbyr emes, elektrmen qamtamasyz etý júıeleriniń tozǵany da jetkizip otyr. Qazir bul másele – oblys ákiminiń tikeleı baqylaýynda», dedi ol.
Oblys aýmaǵynan ótetin Astana – Petropavl, Jezqazǵan – Petropavl, Almaty – Ekaterınbýrg, Kókshetaý – Rýzaevka baǵytyndaǵy avtokólik joldary jabyldy. Biletinderdiń aıtýyna qaraǵanda, mundaı aýa raıy osydan 22 jyl buryn bolǵan eken.
Soltústik Qazaqstan oblysy