Mekteptegi tamaqtanýdyń tıimdiligi men sapasyn arttyrý týraly TMD elderiniń Bishkek qalasynda ótken birinshi halyqaralyq forýmynda qatysýshylar pikir almasty. Oqý-aǵartý birinshi vıse-mınıstri Natalıa Jumadildaeva Qazaqstan mektepteriniń as mázirine 50 ulttyq taǵam engiziletinin aıtty, dep habarlaıdy Egemen.kz vedomstvonyń baspasóz qyzmetine silteme jasap.
О́ńirlerde óndirilgen otandyq ónimderdi paıdalana otyryp, mektep as mázirine ulttyq taǵamdardy engizý – balalar densaýlyǵyn saqtaýdaǵy mańyzdy qadamdardyń biri bolmaq.
«Árbir mektep – salaýatty ómir saltyn ustanatyn mektepke aınalýy tıis. Mekteptiń kez-kelgen qyzmeti saýyqtyrý-pedagogıkalyq baǵytta bolady. «Ulttyq mektep ashanasy» jobasy ulttyq taǵam mádenıetin qalyptastyrýǵa jáne mekteptiń as mázirine 50 ulttyq taǵamdy engizýge múmkindik beredi. Bul dástúr boıynsha jasalǵan mázir, ejelden kele jatqan tájirıbeniń nátıjesi», dedi Natalıa Jumadildaeva.
Atalǵan maqsatta mınıstrlik Ulttyq salaýatty tamaqtaný ortalyǵymen birlesip, Astananyń alty mektebinde «Ulttyq mektep ashanasy» pılottyq jobasyn júzege asyryp jatyr. Jańa úlgide mekteptegi tamaqtaný mádenıetin qalyptastyrý boıynsha kezeń-kezeńimen sharalar kesheni qarastyrylǵan.