Elimizdegi 7 381 mektepte oqıtyn oqýshylardyń arasynda 1,5 mıllıonnan asa bala kúndelikti mektepte tamaqtanady. Al olarǵa as ázirleıtin aspazdardyń kópshiliginde kásibı bilim joq, arnaıy biliktilikti arttyrý kýrstarynan ótpegen adamdar jumys isteıdi, dep habarlaıdy Egemen.kz.
Senattyń búgingi otyrysynda depýtat Aqmaral Álnazarova Úkimet basshysy Álıhan Smaıylovtyń atyna depýtattyq saýal joldap, mektep ashanasyndaǵy jónsizdikti synǵa aldy. Qazaqstandaǵy balalardyń 58%-y anemııaǵa shaldyqqanyn, A dárýmenniń tapshylyǵy baıqalatyn balalardyń qatary 23%-ǵa jetkenin aıtty.
«Bilim berý mekemelerinde tamaqtanýǵa baılanysty toptyq syrqattaný tirkelgen jaǵdaılar kóbeıip ketti. 2020 jyldan beri mektep jasyndaǵy 425-ke jýyq bala tamaqtan toppen ýlaný saldarynan zardap shekti. Negizgi sebepter ashana qyzmetkerleri arasynda ishek ınfeksııasynyń bolǵany, medısınalyq tekserýden ótý týraly qujattardy qoldan jasaý, obektiniń sanıtarlyq-epıdemıologııalyq qorytyndysynyń bolmaýy, azyq-túlikti saqtaý jáne ótkizý sharttarynyń buzylý jaǵdaıy bolyp otyr. Ashana salasyndaǵy qyzmetkerleriniń biliktiligi máselesi erekshe nazar aýdarýdy talap etedi. Árbir úshinshi mektep ashanasynda kásibı bilimi joq aspazdar jumys isteıdi, 21,8%-ynda arnaıy biliktiligi joq. Bilim berý uıymdarynda taza aýyz sýǵa qol jetkizý áli de problema bolyp qalyp otyr. Mektep oqýshylarynyń 68%-y úıden sý ákeledi, shamamen 30%-y mektepten sý satyp alady. Mektep qabyrǵasynda aýyz sýǵa qol jetkizý balalardyń qantty sýsyndardy ishýin azaıtady. Sondaı-aq mekteptegi tamaqtaný quny týraly bir aýyz sóz aıtaıyn. Mekteptegi tamaqtaný qunyn esepteý barysynda shıkizattyq emes shyǵyndar esepke alynbaıdy, ónimdi satyp alýǵa tikeleı shyǵyndar ǵana eskeriledi. Bul tolyqqandy jáne teńdestirilgen mázirdi qamtamasyz etýge múmkindik bermeıdi», dedi senator.