Mádenıet jáne aqparat mınıstrligi Arhıv, qujattama jáne kitap isi komıteti, Astana qalasynyń ákimdiginiń uıymdastyrýymen Qazaqstan Respýblıkasynyń «Ulttyq arhıv qory jáne arhıvter týraly» zańynyń qabyldanýy men Astana qalasynyń 25 jyldyǵyna arnalǵan «ASTANA ARCHIVE FEST» halyqaralyq arhıvıster forýmy ótti, dep habarlaıdy Egemen.kz vedomstvonyń baspasóz qyzmetine silteme jasap.
Forýmǵa Prezıdent Ákimshiligi, Prezıdent arhıvi, Premer-mınıstrdiń Keńsesi, Mádenıet jáne aqparat mınıstrligi, Sıfrlyq damý, ınnovasııalar jáne aeroǵarysh ónerkásibi mınıstrliginiń ókilderi, Parlament depýtattary, Astana qalasy ákiminiń apparaty basshylary, qoǵam qaıratkerleri, arhıv salasynyń sheteldik jáne otandyq mamandary men ardagerleri qatysty.
«Táýelsiz Qazaqstannyń qalyptasý tarıhynda arhıvterdiń aqparattyq áleýetin paıdalanbaý múmkin emes. О́ıtkeni, arhıv isin uıymdastyrýdyń jaı-kúıi memlekettiń damý kórsetkishteriniń biri bolyp tabylady. Sońǵy jyldary arhıv qorlarynyń derekti kózderine qol jetkizýdi uıymdastyrý, olardy sıfrlyq formatqa kóshirý jáne qujattardy ǵylymı, saıası maqsattarda paıdalanýǵa qashyqtan qol jetkizýdi usyný, azamattardyń quqyqtary men múddelerin qorǵaý boıynsha sharalar kesheni júrgizildi. Osy zańnyń aıasynda qabyldanǵan «Mádenı mura», «Halyq tarıh tolqynynda» memlekettik baǵdarlamalary men «Arhıv-2025» keshendi josparlary sheńberinde sheteldik arhıvter men mýzeılerden, ǵylymı ortalyqtardan jáne kitaphanalardan Qazaqstan tarıhyna qatysty qundy qujattar ákelindi», dedi Mádenıet jáne aqparat vıse-mınıstri Arman Júdebaev.
Forým aıasynda elimizdegi arhıvterdiń damý jáne qalyptasý tarıhy týraly «Arhıv – ulttyń tarıhı jady» kórmesi, Ortalyq memlekettik kıno-fotoqujattar men dybys jazbalary arhıviniń qazaq halqynyń áleýmettik-saıası tarıhy men mádenıetine arnalǵan «Arhıv qazynasy – ǵasyrlar kýási» kórmesi jáne Astananyń tarıhynan syr shertetin «Shahar shejiresi» kórmesi men fotoalbomnyń tusaýkeseri ótti.
Jıyn barysynda memleket jáne qoǵam qaıratkerleri, tarıhshy ǵalymdar arhıv mamandarymen arhıv salasyn damytý jáne jańǵyrtý máselesin talqylady. Arhıv salasynyń ardagerlerine qurmet kórsetilip, «Arhıv jáne bolashaq urpaq» atty respýblıkalyq joba aıasynda Astana qalasynyń memlekettik arhıvi ótkizgen «Jas arhıvıst» konkýrsynyń qatysýshylary marapattaldy.
Forýmda elimizdiń alys-jaqyn shet memlekettermen arhıv salasyndaǵy yntymaqtastyqty, baılanystardy keńeıtý, birikken ǵylymı zertteýler júrgizý máselelerimen aınalysatyn otandyq jáne sheteldik ǵalymdardyń ǵylymı-teorııalyq jáne praktıkalyq tájirıbesin jalpylaý men júıeleý boıynsha otyrystar uıymdastyryldy.