Baqyt Qajybaev: «Oıan, qazaq» – ýaqyttyń suranysy

– Baqyt Baqtanuly, esińiz­de bolsa, birneshe jyl buryn jasaǵan suhbatymyzda osyndaı túr-tulǵamen teatr men ek­ran­­nan shyǵarmashylyq múm­kin­digińizdi meılinshe ashatyn laıyqty rólińizdi taba almaı júrgenińizge ókinish bildirip edim. Sol olqylyqtyń orny tolǵandaı ma?

– Iá, ol áńgime esimde. Sebe­bi ol kezde shyǵarmashylyq tol­ǵanys ústinde bolatynmyn. Ak­ter bolǵannan keıin bizdiń bas­ty mindetimiz – el súıip kórip, baǵa­laıtyn oıly, kesek beıneler týdy­­rý ǵoı. Ol teatrǵa da, kınoǵa da qatysty. Bir ǵana rólimen tarıh­ta qalǵan sańlaqtar qanshama. Kerisinshe, ǵumyr boıy óz rólin izdep armanda ketken akterler de az emes. Sondyqtan óner adamy bolǵan soń, naǵyz óner deńgeıinde beıne jasaı alsań, ártis úshin odan asqan baqyt joq shyǵar. Jan tolǵanysynan týǵannan ke­ıin akterge árbir róli ystyq. Biraq báribir jyldar alǵa jyljyp, oıyń tolysqan saıyn ózińe qo­ıylar talap ta kúsheıedi eken. Son­daıda janyń súıip oınaıtyn, oń jambasyńa kelgen beıneniń buıyrýy da – úlken olja. Al endi «Oıan, qazaqqa» kelsek, Mirjaqyp men úshin óte kúrdeli róldiń biri boldy. Qansha degenmen tarıhı tulǵa, ultymyz úshin aıaýly beıne. Kilti tabylmasa, akterge odan ótken úlken ýaıym joq. Halyqtyń kóńilinen shyqpasa, úlken ókinish sol. Mirjaqypty somdaǵanymdy kópshilik qabyldamasa, ózimdi jegideı jep qoıar edim. Sondyqtan bul róldi alǵanda qýanysh pen qorqynysh qatar turdy.

– Úreıdi qalaı úrkitti­ńiz? Rólińiz nesimen erekshe este qaldy?

– Mirjaqyp róli kóp izdenis pen daıyndyqty talap etti. Rólge bekitilgenimdi estigennen-aq tulǵa týraly tushymdy derekterge den qoıyp, bilimimdi tolyqtyrýǵa talpyndym. Ssenarııdi qolyma us­tap kúni uzyn Esil jaǵalap kete­tin­min. Keıipkerimniń ómirbaıany­men, shyǵarmashylyq jolymen ta­nys­tym. Jaz ýaqyty bolǵandyq­tan, ujym eńbek demalysyna shy­ǵyp ketken kez edi. Teatrdyń ishi tym-tyrys. Grım bólmeme kelip rólimdi zertteıtinmin. Mir­jaqyptyń muhıt álemi osylaı­sha ózine baýrap aldy. Jýrna­lıst Maııa Bekbaevanyń derekti fılm­deri de tulǵa tabıǵatyn ta­nýyma kóp kómektesti. Alash qaı­ratkerleriniń ashylmaǵan tus­tary kóp ekenin osy fılmge da­­ıyndyq barysynda túsindim. Ásirese asyldyń synyǵy Gúlnár Mirjaqypqyzynyń ákesi týraly jazylǵan «Shyndyq shyraǵy» kitabyn oqyp shyqqannan ke­ıin Dýlatov álemine birtaban ja­qyn­daǵandaı boldym. Qandaı aýyr taǵdyr deseńizshi!.. Adam osynyń bárine qalaı tózip, ómir súre ala­dy? Alash qaıratkerleriniń ómir joly, eli úshin janyn bergen jankeshtiligi meni qatty tol­ǵandyryp, sanama shyn máninde úlken silkinis jasady. Ol kisi­lerge degen súıispenshiligim, qur­metim odan saıyn eselene tústi. Esh­qaısysyn bólip-jara almadym. Barlyǵy da batyr, barlyǵy da qubylys. Ult ustazy Ahmet Baıtursynuly, Álıhan Bókeıhan, Mirjaqyp Dýlatuly dep jalǵasyp kete beredi. Olardyń oıy bir jerden shyqty, maqsaty ortaq boldy. «Qaıtsek derbestik, táýelsizdik alamyz?» dep kúresti. Qaıran erler, «Urpaǵymyz kózi ashyq, bilimdi bolsa eken» degen armanmen ótti ǵoı. Telehıkaıanyń ssenarııin oqyp otyryp, sońyna kelgende óksik qysyp, jarty saǵattaı esimdi jınaı almaı otyrdym. Qasymda eshkimniń bolmaǵany mundaı jaqsy bolar ma? Alash arystarynyń ult táýelsizdigi jolynda janyn shúberekke túıip, basyn ólimge tikken kózsiz erligi, ultyn sheksiz súıgendigi qatty tebirentti. Rasynda, biz Alash qaı­ratkerlerin tanymaıdy ekenbiz ǵoı dedim. Qalaı ólimge barǵa­ny, bir tıyn aqy almaı halqyna tegin qyzmet etkeni. Naǵyz eli úshin týǵan erlerdiń isi. Qarap otyrsam, Mirjaqyptaı erlerdiń atqa qonyp, eli úshin erlik istegen kezeńi qazirgi bizben tustas kezderi eken. Kózime jas alyp otyryp, «Men ózimniń elime ne istedim?», «Tilime, Otanyma qandaı paıdamdy tıgizdim?» degen suraq qoıdym. Osy serıaldyń túsiriliminen keıin sanamda, tanymymda alapat tóńkeris boldy. О́mirge, ómir súrý qalybyma degen kózqarasym ózgerip, tipti ózimdi qamshylaı bastadym. Mirjaqyptyń «Oıan, qazaǵynyń» máni maǵan endi ashyla túskendeı.

– Al túsirilim kezinde qandaı qıyndyqpen betpe-bet keldi­ńiz? Oıyńyzdaǵy Mirjaqypty somdaı aldyńyz ba?

– Maǵan úlken qıyndyq ýaqyt­tyń tapshylyǵy boldy. Keıde «asyǵystyq atústilikke uryn­dy­rar ma eken» dep qaýiptengenim de ras. Biraq maǵan túsirilim ala­ńynda ssenarısterdiń ult­jan­dylyǵy, Alashqa degen mahabbaty rýhanı turǵydan qatty kómektesti. Murat Esjan, Ushqyn Sáıdirahmanuly jáne Ularbek Nurǵalymuly úshtiginiń oı ush­qyr­lyǵyna tánti boldym. Sse­na­rıı bir oqyǵannan-aq meni selt etkizdi. Avtorlardyń muraty bir­den júregime jetti. Odan keıin jeke basyma taǵy bir erekshe áser etken tus – biz oınaǵan kezde róldi qalaı ashsam eken dep qınalǵan joqpyz. О́ıtkeni avtorlar qaı tusyn qalaı ashý kerek eke­nin usaq-túıegine deıin kórsetip, aıtyp berdi. Akterler quramy sse­narısterdiń izdenimpazdyǵy­na, talantyna tánti boldyq. Dra­matýrgııalyq qurylymy da qıyn­nan qıystyrylyp, bir-birine kiriktirilip jazylǵan ǵoı. Sózdiń kúshi, oınaýdyń kúshi bári kórinip turady. Qazaqtyń tili qandaı baı edi! Ony kıno tiline sátti aınaldyra alǵan jigitterdiń eńbegi aıryqsha atap ótýge turarlyq. О́zge keıipkerlerge qaraǵanda Mir­jaqypty bir saty joǵary qoıyp qoı­ǵanyn sezinip oınadym. Bul ma­ǵan erekshe shabyt syılady.

– Akterdiń shyǵarmashylyq qýatynyń ashylýyna qasyn­daǵy seriktesiniń septigi de kóp tıedi. Osy turǵydan kelgende «Oıan, qazaq» fılmindegi eń sátti seriktesim dep qaı akterdi aıryqsha aıtar edińiz?

– «Oıan, qazaq» «Ahmet. Ult us­ta­­zynyń» jalǵasy bolǵannan ke­ıin sol jaqtaǵy negizgi keıipker­ler­­diń barlyǵy bul jobaǵa da birge kel­dik qoı. Tek keıbir akterler ǵana aýysty. Alǵashqy jobadan-aq bir-birimizge baýyr basyp qalǵandiki me, ásirese Aqańnyń rólin oına­ǵan Baıǵalı Esenálıevti ózimsinip aldym. Ol kisimen túsirilgen árbir sahna úlken mereke boldy de­sem, artyq aıtqandyǵym emes. Jany jaısań, kóńili keń erekshe bir bııazy adam ǵoı. Qasynda júrip óziń de bir tynyshtyqqa ıe bolasyń, janyńa senim uıalaı­dy. Jobadaǵy men birden qabyl­daǵan beıne – osy Baıǵalı aǵam­nyń keıipteýindegi Ahmet Baı­tur­synuly beınesi. Sóılesken sátten-aq Mirjaqyptyń Aqańa degen qurmetindeı erekshe bir sezim meni de baýrap aldy. Sol sekildi Ǵaınıjamaldy oınaǵan Zarına Kármen de talantty aktrısa ǵoı. Ekranda erkin túsinisken jaq­sy seriktesterimniń biri bol­dy. Kerisinshe, bastapqyda joba rejısseri Murat Esjandy qa­byldaı almadym. Tym jas kó­rin­di. «Alash arystaryn la­ıyq­ty deńgeıde asha alar ma eken?» degen  kúdik te boldy. Alaıda jumys barysynda Murat meni tereńdigimen tánti et­ti. Bul taqyrypqa rejısser de, ssenarıster de úlken daıyn­dyqpen kelgen eken. Ár sózdi aıalap qoldanǵan olar bizden de mátinge qurmetpen qaraýdy ótin­di. «Barynsha ssenarııde ja­zylǵan mátindi aıtyńyzdar. О́z sóz­derińizdi qospańyzdar. Sebebi ár sóılemdi qaıratkerlerdiń óz eńbeginen alyp, stılin saqtap, ár tirkes arqyly sol dáýirdiń únin jetkizýge tyrystyq», dep talap qoıdy. Osydan keıin-aq aýzymyzdan shyqqan ár sózdiń durys ıntonasııamen saýatty aıtylýy­na mán berdik. Munyń barlyǵy neni bildiredi? Shyǵarmashy­lyq toptyń tarıhtyń ár deregine, fılmniń ár detaline úlken ja­ýapkershilikpen qaraǵanyn ańǵar­tady. Osynyń arqasynda joba­nyń da juldyzy janyp, fılm biz kútken nátıjeden de asyp tústi. Alash abyroıyn asqaqtatqan, rýhyn oıatqan tushymdy dúnıe týdy ǵoı dep oılaımyn. Taǵy bir aıtarym – Murat  rólge akter tańdaýda da dóp túsedi. Nátıjesinde, talaı akterdiń juldyzy jandy. О́z basym, ásirese Ahmet Baı­tur­synuly róline tańdalǵan Baı­ǵalı Esenálıev oıynyna shyn ıla­nyp, Aqań dep qabyldadym. Al ondaı sátti iriktelgen akterler jobada óte kóp.

– Túsirilim barysynda ja­nyńyzdy eljiretken qandaı epı­zod boldy?

– Fılmde kóńildi qozǵaıtyn tus óte kóp. Kórermen túgili oınap júrip ózimiz bosańsydyq. Sonyń ishinde janyma aıryq­sha áser etken kórinis Mirjaqyp ata­myzdyń Ombydaǵy túrmede eki jyl bolyp, eshkimge aıtpaı úıine kirip kelgende, qyzy Gúlnár men Ahmetsafanyń ulynyń oınap otyryp alystaǵy ákelerin saǵynatyny, ákesin kórgendegi Gúlnárdyń qýanyshy, olardyń qaýyshý sahnasy maǵan erekshe áser etti. Ondaı taǵdyrdy basym­nan keshpesem de, oınap júrip janym jylady. Ákelik mahab­batym da osy kóriniste eshqandaı akterlik árleýsiz, dál ómirdegideı shynaıy ashyldy ǵoı dep oılaımyn. Mundaı jaǵdaılar óte kóp. Sanamalap aıtý múmkin emes. Túsi­rilim kezin aıtasyz, tipti fılm jaryqqa shyqqannan ­ke­ıin de júrekti eljireter biraz jaıt­ basymnan ótti. Almaty­daǵy saýda ortalyǵynyń birinde júr edim, tutqıyldan beıtanys jigit tap kelip, meni qushaqtap al­dy. Alǵashynda túsinbeı qaldym. Qarasam, kózine jas alyp, erek­she tolqyp tur eken. «Aǵa, keshirińiz­shi! Sizdi kórgende Mirjaqyp atam aldymnan shyǵa kelgendeı boldy. Fılmdi keshe kórip shyqtym. Jan dúnıemdi tóńkerip tastady», dedi. Buǵan deıin mundaı jaǵdaı basymnan ótpegennen keıin qapelimde ne derimdi bilmeı qalǵanym ras.  Shynymen kútpegen jaıt boldy. Tipti ózimdi qalaı ustarymdy bilmedim. Buǵan deıin de qanshama kınoǵa túsip júrmin ǵoı. Biraq mundaı jaǵdaı bolǵan emes. Sol kezdesýdiń áserinen uzaq ýaqyt shyǵa almadym.

– Rejısser Murat Esjan fılmniń tusaýkeser rásiminde: «Bizdiń elde tarıhı kınolar az túsiriledi. Bundaı dúnıelerdi kórmeıdi, túsinýge kópshiliktiń deńgeıi jetpeıdi degen tujyrym qalyptasady. Sol senimdi buz­saq», dep kópshilikke úndeý tastaǵan edi. Sol úndeý tamasha nátıje berip, «Oıan, qazaq!» kınoteatrlarda kórsetilim­niń kóshin bastady. Bul – shynymen de jastardyń rýhyn oıatyp, qoǵamdaǵy qalyptasqan qasań qaǵıdalardy buzǵan kıno álemindegi úlken jańalyq boldy. Al siz qalaı oılaısyz, «Oıan, qazaq» qazaqty oıata aldy ma?

– Kınoteatrlardaǵy bul kór­set­kish kórermenderdiń jeńil ko­­medııalardan jalyǵyp, tereń taqyryptarǵa sýsaǵanyn aıqyn ańǵartty. Shynymdy aıtsam, tarıhı fılmge dál osyndaı aýdıtorııa jınalady dep ózim de kútken joqpyn. Ony halyq ta kútpedi. Shynyn aıtqanda, kınonyń mun­daı suranysqa ıe bolatynyna biz daıyn bolmadyq. Kınoteatr­lar­ǵa bar-joǵy eki aptalyq kórse­ti­lim­ge shyǵarǵan ulttyq arnada­ osylaı bolady dep bolja­ǵan joq. «Mirjaqyp. Oıan, qazaq!» fılminiń montajy júrip jat­qan kezde rejısser Murat Esjan­nan «Erteń kórermenniń aldynda uıatqa qalyp júrmeımiz be?» dep suradym. Kıno túsirilimi aıaq­talǵan soń da ýaıymym údeı tústi. «Mirjaqyptyń beınesiniń kil­tin taba aldym ba?» degen oı da janymdy jegideı jep, bir sát maza bermedi. Biraq kınoteatrlarda kórsetilim bastalǵannan keıin-aq halyqtyń ózi birinen soń biri ilip áketip: «Baryńyzdar, kórińiz­der!» dep nasıhattaýǵa kiristi. Bul – halyqtyń rýhanııatqa, ózimiz­diń shyqqan tegimizge shólirkep qalǵanynyń kórinisi dep oılaımyn. «Oıan, qazaq» – ýaqyttyń suranysy. Elge qyzmet etken Alash arystary týraly osyndaı fılmderdi kóptep túsirip, halyqqa esimderin jańǵyrta bersek, qazaq utpasa utylmaıdy. El úshin janyn qurban etken ardaqtylarymyzǵa bul kınolar óte azdyq etedi. Alty bólimniń ózi meje emes. Alda áli de talaı izdenis kerek. Sebebi biz búgingi mamyrajaı ómirimiz, azat­tyǵymyz úshin boztorǵaıdaı shy­ryldap, eldiń qamyn aıtqan, ǵy­lym-bilimge shaqyryp, aǵar­týshylyqpen aınalysqan, «ege­mendik alsaq» dep uly arman­men ótken tulǵalarymyzdyń al­dynda boryshtarmyz. Myna beı­bit zamanda Alash zııalylary týra­ly fılm túsirmeý qııanat bo­lar edi. Halyqtyń sanasyn oıatý­dyń birden-bir joly osy. «Alash» partııasynyń ókilderi de­sek, birden Álıhan, Mirjaqyp pen Ahmet oıǵa oralady, odan ári asa almaımyz. Budan bólek qan­sha qaıratker bar. Solardyń árqaı­sysyna arnap bir-bir fılm túsirsek, artyq bolmas edi.

– Endi teatr jaqqa qaraı oıysaıyqshy. Belgili rejısser, Memlekettik syılyqtyń laýreaty Nurqanat Jaqypbaı sheberhanasynan túlep ushqan sizdiń kýrs 2007 jyly Astana tórinen Jastar teatry­n ashtyńyzdar. Búginde sol teatrdyń beldi akte­riniń birisiz. Teatr­daǵy tyny­syńyz qalaı?

– Bul jaǵynan men ózimdi jo­ly bolǵan jandardyń qata­ryna jatqyzamyn. Nurqanat Jaqyp­baıdaı talapshyl da talǵampaz rejısserdiń tálimin kórip, grýppalas, dos degenniń shekarasynan asyp, búginde baýyrǵa aınalyp ketken Ádil Ahmetov: Dáýren Ser­ǵazın, Azamat Esqulov, Jandáýlet Bataı, Aınur Rahıpova, Mádına Maı, Mahabbat Madǵulova syndy jaqsy jandarǵa jolyǵýym – taǵdyrdyń maǵan jasaǵan úlken tartýy, syıy. Sahnada ǵana emes, ómirde bir-birimizdi demep, qoldap kelemiz. Meniń baqytym sol – tórt jyl birge oqyǵan dostarymmen ajyramaı júrip, jańa teatr ashý deıtin tarıhı sátti bastan keshtik. Jan-jaqqa tarydaı shashyrap ketpeı, barlyǵymyz birge Jastar teatrynda qyzmet etip kelemiz. Ustazymyz qasymyzda. Áripte­sim Ádil Ahmetov: «Biz Nurqanat Jaqypbaıdyń 21-kýrsynda oqyp jatyrmyz», dep ázildeıdi. Ol ras, ustazymyzdyń aldynda biz áli shákirtpiz. Áli de úırenerimiz kóp. Alla ol kisige uzaq ǵumyr ber­sin dep tileımin.

– Rejısser Nurqanat Ja­qyp­baıdy  talapshyl dep jaq­sy sýrettedińiz. Sol talapshyl usta­zyńyz kıno álemin dúr sil­kintken «Oıan, qazaqtaǵy» ró­lińizdi qalaı baǵalady?

– Ol kisi shákirtterin kózine kóp maqtaı bermeıdi. Biraq Alma­tyda ótken bir úlken jıynda «Oıan, qazaqty» kórgen belgili ǵa­lymdar, óner qaıratkerleri Mir­jaqyp týraly jyly lebiz­de­rin bildirgen eken. Keıin sony tilge tıek etip Nurqanat aǵa­­myz ujymda ótken jınalysta eń­begime oń baǵasyn beripti. Biraq ózim kezekti túsirilimde júr­gen­dikten, ol kúngi jınalysqa qaty­sa almadym, áriptesterimnen es­tidim. «Balasy atqa shapsa, anasy úıde otyryp taqymyn qy­sady» demekshi, ustazymyz ónerde óz jolyn qalyptastyryp kele jat­qan árqaısysymyz úshin tilekshi, jankúıer ǵoı. Sol qoldaý bizdi qanattandyrady.

– Kıno salasynda Mirja­qyp róli mereıińizdi ústem etti. Al teatrda she? О́z rólińizdi ­taba aldyńyz ba?

– Teatrda somdaǵan árbir ró­­lim – janymnyń, júregimniń bólshe­­gi. Sebebi ár beıne úlken eńbek ­pen tynymsyz izdenistiń, janyńdy jegideı jeýdiń nátıjesinde ómir­ge keledi. Bul jaǵynan kelgende «Kishkentaı ról bolmaıdy, kishkentaı akter bolady» degen áıgili qaǵıda meniń únemi ja­dymda turady. Sondyqtan ár­bir rólime, ol meıli basty, meıli qosalqy bolsyn, bárine bir­deı izdenemin. Barlyǵy birdeı ystyq. Áıtse de, akterdiń ishinde bu­ǵyp jatqan armandary bolady ǵoı. Ony ashyp aıtyp tastaǵym kelmeıdi. Arman qupııa bolsa, tez oryndalady deıdi. Sondyqtan shyǵarmashylyqqa qatysty ishimde jatqan oılardy jarııaǵa jar sala bergim kelmeıdi. Ýaqyty kel­gende oryndalar. Mirjaqyp se­kildi baǵymdy ashyp, kórermen kóńilinen shyǵatyn, tabıǵatym men ishki qalaýyma dóp kele­tin kesek beıne teatr sahnasynda da týatyn shyǵar. Teatrdaǵy óz rólimdi áli tapqan joqpyn. Izdenis ústindemin.

– Akter Baqyttyń armanyn bildik, al bala Baqyt qandaı edi? Balalyq shaqqa az-kem saıa­hat jasap kórsek...

– Almaty qalasynda týyp-óstim. Qalanyń balasy bolǵannan keıin orys tiline júırik boldym. Tipti qazaq tilin múldem bil­medim. Tentektigimdi sózben aıtyp jetkizý múmkin emes. Bala­baqshadaǵy tárbıeshilerdiń syn-eskertpesin jıi estı bergen soń, onyń ústine qazaq tilin úırensin dep ata-anam Shymkentte turatyn naǵashy ájemniń qolyna berip tyndy. 4-synyptan bastap sol kisiniń tárbıesin aldym. Apam jy­ly-jumsaǵyn usynyp, qazaq tilin úıretip qana qoımaı, meni eńbekke de baýlydy. Aýylda jú­rip sharýanyń barlyq túrin istep úırendim. Jer aýdaryp, baý-baqsha egetinbiz. Ájemdi ertip, aýyzashar men qonaqqa da jıi baratynmyn. Munyń barlyǵy óte úlken tárbıe dep bilemin. Sonda júrip qazaqtyń barlyq jón-joralǵy, dástúr-saltynyń syryna qanyqtym. Sonyń áseri bolsa kerek, búginde meni qalanyń balasy dep eshkim aıtpaıdy. Sol úshin de apama rızamyn. Máńgilik qaryzdarmyn. Al endi balalyq armanǵa kelsek, esimdi bilgennen bastap ushqysh bolýdy armandadym. Biraq aǵam telearnada operator bolyp ju­mys istegennen keıin, meni de osy sala qatty qyzyqtyrdy. Mek­tep bitirgennen keıin operator­lyq­qa oqýǵa túseıin dep óner aka­demııasyna kelsem, aldym­nan Aqken­je Álimjan kezdesip, meni akter­lik kýrsqa túsýge úgitteı bas­tady. «Ártis bolý buryn nege oıy­ma kelmegen?» dep sol kezde alǵash ret oılandym. Sóıtip, aıaq astynan akter bolýǵa ańsarym aýyp, Aqkenjeniń sońynan erdim. Osylaısha, 2002 jyly akterlik bólimge Nurqanat Jaqypbaı sheberhanasyna qabyldandym. Biraq oqýdy aıaqtap, dıplomymdy alǵannan keıin de ushqysh bolý armanymnan bas tarta almadym. Sóıtip, 2006 jyly Almatydaǵy Azamattyq avıasııa akademııasyna oqýǵa qujat tapsyrdym. Alaıda memleket bólgen grantty akterlik bilim alýǵa paıdalanyp qoıǵannan keıin, endi tek aqyly túrde ǵana oqýǵa tapsyrýǵa quqym bar eke­nin bildim. Al ózińiz biletindeı, avıasııa – óte qymbat sala. Táji­rıbeden ótý úshin ushaqty bir ret ushyryp, qondyrýdyń ózi sol kezde 10 myń dollar turady eken. Soǵan qaramastan táýekel dep emtıhanǵa kirdim. Eger tús­sem, qalaıda bolsyn oqyǵym keldi. Biraq buıyrmaǵan shyǵar, keshendi test kezinde fızıkadan tapsyrǵan emtıhanymdy hımııa dep qabyldap, tómen ball alyp qaldym. Saparda júrip, kelgen soń appelıasııaǵa bersem, kesh dep ony da qabyldamaı qoıdy. Áıtpese «qabyldaý komıssııasyndaǵy ma­man­dar túriń de, turpatyń da ush­qysh bolýǵa kuıyp qoıǵandaı eken» dep quraq usha qarsy alyp edi, amal neshik... Sóıtip, teatryma qaıta oraldym.

– Áńgimeńizge rahmet.

Áńgimelesken –

Nazerke JUMABAI,

«Egemen Qazaqstan»