Jańa jyl qarsańynda «Astana Opera» sımfonııalyq orkestriniń birinshi skrıpkashysy, Qazaqstannyń eńbek sińirgen qaıratkeri Baǵdat Ábilhanov pen teatrdyń Kameralyq orkestri elorda qonaqtary men turǵyndaryna tamasha tartý jasady. Ásirese Qazaqstannyń eńbek sińirgen qaıratkeri, dırıjer Aıdar Ábjahanovtyń jetekshiligimen oryndalǵan ıtalııalyq barokko men argentınalyq tango týyndylary jurtshylyqty jyly áserge bóledi.
Daryndy dırıjer Aıdar Ábjahanov álemniń jetekshi teatrlarynda birneshe márte óner kórsetip, aty ańyzǵa aınalǵan ıtalııalyq La Scala teatrynda taǵylymdamadan ótken. Sondaı-aq ol Savaria Symphony orkestrimen birge Bartok festıvaline (Sombatheı, Vengrııa), Aýstrııa astanasy Venadaǵy Vidin Philarmonic Orchestra bazasynda Zoltan Peshkonyń, Salvador Mas Kondeniń sheberlik sabaǵyna qatysyp, qoıýshy dırıjer retinde birqatar balet spektakliniń joǵary deńgeıde ótýine úlesin qosqan.
Klassıkalyq saz áýelegen keshte kórermender talantty dırıjerdiń jetekshiligimen oryndalǵan XVII ǵasyrdyń venesııalyq rýhy Antonıo Vıvaldıdiń mýzykasymen qanattanyp, Astor Pıassolla jasaǵan Býenos-Aırestiń ǵajaıyp álemine sapar shekkendeı boldy.
Keremet keshtiń alǵashqy bóliminde teatr mýzykanttary A.Vıvaldıdiń «Jyl mezgilderi» atty konsertter toptamasyn usyndy. Munda shýaqty kóktemnen bastap, qytymyr qys mezgiline deıingi árbir kompozısııa tyńdarmanǵa mýzyka arqyly ár maýsymnyń ózine tán ereksheligin ashyp berdi. Bul toptama túrli mýzykalyq aspaptardyń árleýimen pop jáne rok mýzykada, kınoda keńinen qoldanylady.
Ekinshi bólimde Astor Pıassollanyń «Býenos-Aırestegi jyl mezgilderi» shyrqaldy. Argentınalyq kompozıtordyń tangonyń syry tunǵan mýzykasy ıtalııalyq barokko men latyn amerıkalyq saryndardyń arasyndaǵy «altyn kópir» sekildi. Mundaǵy qushtarlyq pen yrǵaqty sózben jetkizý qıyn. Kompozıtor osy shyǵarmasyn keıde birge, keıde jeke oryndaǵan dep aıtady.
Sondaı-aq Kameralyq mýzyka keshinde Qazaqstannyń eńbek sińirgen qaıratkeri Baǵdat Ábilhanov sıqyrly skrıpka únimen oryndaǵan tamasha týyndylary tyńdarmandy tánti etti.