Senattyń Áleýmettik-mádenı damý jáne ǵylym komıtetiniń tóraǵasy Nurtóre Júsip Ǵylym jáne Joǵary bilim mınıstri Saıasat Nurbekpen kezdesti. Kezdesý barysynda saladaǵy birqatar ózekti másele, onyń ishinde otandyq ǵylymdy damytý, joǵary bilim sapasyn kóterý, sondaı-aq elimizdegi til saıasatyn damytý máseleleri talqylandy.
Depýtat joǵary bilim berý máselelerine, onyń damýy men halyqaralyq standarttarǵa sáıkestigine Senat basshylyǵy erekshe nazar aýdaryp otyrǵanyn mınıstrlik basshylyǵynyń nazaryna jetkizdi. Depýtat sonymen qatar til saıasaty, atap aıtqanda, memlekettik tildi zamanaýı tehnologııaǵa kiriktirý máselesine de toqtaldy.
«Prezıdent alǵa qoıǵan mindetterdi oryndaý aıasynda jáne «Kreatıvti ındýstrııany damytý perspektıvalary jáne zııatkerlik menshikti qorǵaýdyń quqyqtyq tásilderi» taqyryby boıynsha ótetin dóńgelek ústelge daıyndyq barysynda komıtet depýtattary «Til-qazyna» ulttyq ǵylymı-tájirıbelik ortalyǵynda boldy. Sapar barysynda mekeme sarapshylarymen birge kreatıvti ındýstrııany damytýdyń keleshegin talqyladyq. Ol, atap aıtqanda, memlekettik tildi jasandy ıntellekt salasyna kiriktirý jáne memlekettik tildi oqytýdyń ozyq tásilderin ázirleý máselesi bolatyn. Prezıdent tarapynan jasandy ıntellekt salasyn damytý, sondaı-aq ony bizdiń ómirimizge kiriktirý máselesine erekshe nazar aýdarylyp otyr. Memleket basshysy alǵa qoıǵan mindetterdi Senat pen Úkimet sizdiń mınıstrliktiń atynan, onyń ishinde qajetti zańnama negizderin jasaý arqyly sheshý tásilderin birlesip ázirleýge tıis dep sanaımyn», dedi Nurtóre Júsip.
Mınıstr óz kezeginde til saıasatyn damytýǵa jáne osy saladaǵy tıisti normatıvtik-quqyqtyq aktilerdi udaıy jetildirýge baǵyttalyp atqarylyp jatqan sharalar týraly depýtatty habardar etti.