Almatyda ótken dırektorlar forýmyna 800-den asa memlekettik mekteptiń dırektorlary qatysty. Alqaly jıynda Almaty qalasy, Jetisý jáne Almaty oblystarynyń mektep dırektorlary, bilim basqarmalary men bólimderiniń basshylary bilim berý salasyndaǵy ózekti máselelerdi talqylady, dep habarlaıdy Egemen.kz Oqý-aǵartý mınıstrliginiń baspasóz qyzmetine silteme jasap.
«2023 jylǵy bilim salasyndaǵy barlyq baqylaý is-sharalarynyń qorytyndysy boıynsha Oqý-aǵartý mınıstrligi birqatar tejeýshi faktorlardy anyqtady. Bul, óz kezeginde, usynylatyn bilim berý qyzmetteriniń, bilim sapasynyń tómendeýine jáne balalardyń bilim alý quqyqtarynyń buzylýyna ákeledi. Nátıjesinde mınıstrlik tarapynan ádistemelik usynymdar berilip, barlyq anyqtalǵan zańbuzýshylyqtardy joıý boıynsha jumys isteldi. Jıynǵa respýblıkalyq kadr rezerviniń músheleri – «Bilim berýdegi jańa ózgeristerdiń 1000 kóshbasshysy» baǵdarlamasynyń túlekteri de qatysty. Sondaı-aq forýmda Almaty qalasy, Almaty oblysy jáne Jetisý oblysy mektepteriniń basshylary sóz sóıledi. Olar Oqý-aǵartý mınıstrine tikeleı saýaldaryn qoıyp, jaýaptaryn aldy», delingen aqparatta.
Mundaı forým elimizdiń ózge óńirlerinde de uıymdastyrylmaq.