Senatta «Qazaq Oxford Dictionary» sózdigi tanystyryldy. 60 myń sóz qamtylǵan 1 300 betten turatyn basylymdy «Qazaq tili» halyqaralyq qoǵamy Prezıdent Qasym-Jomart Toqaevtyń tapsyrmasy boıynsha daıyndaǵan.
Áleýmettik-mádenı damý jáne ǵylym komıtetiniń tóraǵasy Nurtóre Júsip shara barysynda qazaq tiliniń álemdegi eń tanymal jáne bedeldi Oxford sózdigimen ózara is-qımyly memlekettik tildi álemdik lıngvıstıkalyq keńistikke shyǵarýǵa yqpal etetin mańyzdy jumys ekenin atap ótti.
«Bul sózdik tilimizdiń halyqaralyq qoldanys aıasyn keńeıtip, túrli salalardaǵy termındik túsinikterdiń memlekettik tilde qalyptasýyna yqpal etedi. О́zderińizge belgili, Aýdarma bıýrosy Raýan Kenjehanulynyń jetekshiligimen «100 kitap» jobasy aıasynda álemdik úlken eńbekterdi qazaq tiline aýdardy. Olar búgingi tańda joǵary oqý oryndarynda keńinen paıdalanylýda. Bul sózdik te sondaı maǵynaly eńbektiń biri bolady dep paıymdaımyn», dep atap ótti senator Nurtóre Júsip.
Is-sharaǵa Senat depýtattary, «Qazaq tili» halyqaralyq qoǵamy» qoǵamdyq birlestiginiń prezıdenti Raýan Kenjehanuly, ǵalymdar men elimizdiń sarapshylar qaýymdastyǵynyń ókilderi qatysty.