Buǵan deıin Ashyq HQA portalynda elimizdiń Jol qozǵalysy erejeleriniń 16-tarmaqshasyna ózgeris engizýdi kózdegen joba jarııalanǵan edi. Alaıda atalǵan ózgeris qoǵam tarapynan qoldaý tappady. Ol qandaı ózgeris jáne engizilmeýiniń sebebi nede?
Bul suraqqa IIM M.Esbolatov atyndaǵy Almaty akademııasy Ákimshilik-quqyqtyq pánder kafedrasy basshysynyń orynbasary, polısııa podpolkovnıgi Ásem Qyrǵyzbekqyzy jaýap beredi.
– Buǵan deıin IIM qoǵamdyq talqylaýǵa Jol qozǵalysy erejelerine, Kólik quraldaryn paıdalanýǵa ruqsat berý jónindegi negizgi erejelerge ózgerister engizý jobasyn usynǵan bolatyn. Qujatta «Baǵdarshamnyń jasyl túsi janǵan kezde jaıaý júrginshiler jol qıylysynda qozǵalysyn bastap qoıǵan kólikterge manevrin aıaqtaý maqsatynda jol berýge tıis» degen tarmaq qarastyrylǵan.
Qazirgi ereje boıynsha jaıaý júrginshi baǵdarshamnyń jasyl túsine ótý kezinde qıylystaǵy burylyp jatqan kólikterge qaramaıdy, kólikter adamdardy ótkizýge mindetti. Jaıaý júrginshiler aınalasyndaǵy kólikterdiń bar-joǵyna qaramaǵandyqtan, saldarynan kóshe qıylystarynda jol-kólik oqıǵalary jıi bolyp jatady. Polısııa osyny eskerip, jaıaý júrginshiler ózderine jasyl tús janyp turǵanyna qaramastan, qıylystaǵy manevrin bastap qoıǵan kólikterdi aldymen ótkizip baryp, joldan ótse, apattar oryn almaıdy dep paıymdaǵan bolatyn.
Alaıda atalǵan ózgeristerdi engizý qoǵam men sarapshylar tarapynan qoldaý tappady, sondyqtan jobadan alyndy. Elimizde servıstik polısııa modeline sáıkes polısııa qyzmetkerleri qoǵamdyq qaýipsizdikti qamtamasyz etý máselelerin qoǵammen birlese otyryp sheshedi jáne qoǵam pikirine árdaıym qulaq asady.