Jetisý oblysynda múgedektigi bar azamattarǵa ınklıýzıvti orta qurý jumysy sátti iske asyp jatyr. О́ńirde erekshe jandarǵa stasıonarlyq, jartylaı stasıonarlyq jaǵdaıda qyzmet kórsetetin 13 ortalyq bar. Sonyń biri – «Qamqor». Onda múmkindigi shekteýli adamdardyń armanyna qanat bitirer bastamalar qolǵa alynyp jatqany qýantady.
«Qamqor» Taldyqorǵan arnaýly áleýmettik qyzmet kórsetý ortalyǵynda oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Ermek Mızambaev jáne mekemede tárbıelenip jatqan erekshe balalardyń birneshe ata-anasy arnaıy ortalyqqa jınaldy. Biz de solarmen birge ǵımaratty aralap kórdik. Sondaǵy balalardyń jumysymen tanysyp, dıdarlastyq.
«Bul jerde 3 jastan 18 jasqa deıingi erekshe balalardy qamqorlyǵyna alyp kelse, jaqynda ata-analardyń ótinishimen 18 jastan 30 jasqa deıin ulǵaıtý isin Eńbek jáne halyqty áleýmettik qorǵaý mınıstrligimen birlese otyryp qarastyryp, júzege asyrdyq. Al oblysymyzda 21 350 múgedektigi bar azamat tirkelgen», deıdi E.Mızambaev.
Eki qabattan turatyn «Qamqor» arnaýly ortalyǵynda bıyldan bastap 18 jastan asqan azamattar úshin stasıonar jaǵdaıynda 50 oryndy bólimshe jumysyn bastady.
«Qyzym Nazerke týǵannan dertti bolyp, osy ortalyqqa bergenbiz. Eki aı buryn 18 jasqa tolǵan qyzym bul mekemede 8 jyl ýaqytyn ótkizdi. Arasynda úıge alyp ketemiz, biraq óz ortasyn, osy bir mekemeni saǵynyp turady. Bastapqyda 18 jasqa deıin bolatyn, oblys basshysyna ótinish jazyp, 18 jastan asqandardy da qabyldaıtyndaı múmkindik aldyq. Bul turǵyda ótinishimizdi bir saǵatqa jetkizbeı sheship bergen oblys ákimi Beıbit Isabaevqa erekshe alǵys bildiremin», deıdi Dınara Qýatbekqyzy.
Búginde «Qamqor» ortalyǵynda 104 azamat kómek alyp jatyr. Bul úshin ortalyqta barlyq jaǵdaı qarastyrylǵan. Mekeme aýmaǵynda oıyn alańy, sporttyq alańdar men jylyjaı bar. Aldaǵy ýaqytta monsha salý josparlanǵan. Al qyzmet alýshylardy emin-erkin tasymaldaý úshin kólik alýǵa qarajat bólingen. Alda ol ıgilikke de qol jetedi.
Jetisý oblysy