О́mirde tosyn, tótenshe jaǵdaılar bolmaı turmaıdy. Qıyn kezde qınalǵannyń qasynan tabylyp, aýyrtpalyǵyn birdeı kóterisetin qutqarýshylardyń orny bólek.
Mańǵystaý oblysynda qutqarý qyzmeti 1995 jyly quryldy. Sodan beri apatty jaǵdaı men órtti joıý bólimsheleri 80 myńnan asa qutqarý qyzmetin júzege asyrǵan. Osy ýaqyt aralyǵynda qutqarýshylardyń kásibıligi men jedeldiginiń nátıjesinde 5 myńǵa jýyq adam qutqarylyp, zardap shekkenderge medısınalyq kómek kórsetilip, TJ-nyń túrli aımaqtarynan 18 myńnan asa adam evakýasııalanǵan.
О́ńirlik azamattyq qorǵanys basqarmasynyń bastyǵy Ratbek Demeýbergenniń aıtýynsha, óńirimizde byltyr qutqarýshylardyń kómegimen 300-den asa adam qutqarylyp, 600-ge jýyq adam evakýasııalanǵan, sondaı-aq 70-ten asa azamatqa alǵashqy medısınalyq kómek kórsetilgen.
– Qutqarýshy mamandyǵy eń suranysqa ıe jáne qurmetti mamandardyń biri bolyp qala beredi. Qutqarýshylar qıyndyqqa tap bolǵan adamdarǵa kómekke asyǵady, olardyń ómiri úshin kúresedi, kún saıyn derlik tuzaqqa túsetin janýarlardy da kómeksiz qaldyrmaıdy, – dedi Ratbek Demeýbergen.
О́ńirde turaqty negizde aldyn alý jumystary júrgizilýine qaramastan, tótenshe oqıǵalar men órt tutaný jaıttary jıi tirkeledi. Al jaz aılarynda, ıaǵnı teńizge shomylý maýsymynda sýǵa ketý oqıǵalary oryn alady. Turǵyndardyń tyıym salynǵan jerlerden sýǵa túsýiniń sońy qaıǵyly, qıyn jaǵdaılarǵa dýshar etedi.
Sýdan qutqarýdyń qıyndyǵymen betpe-bet kelgenderdiń biri – Mańǵystaý oblysy TJD «О́S jáne AQJQ» MM Jedel qutqarý jasaǵynyń bas qutqarýshysy Joldasov Quralbaı. Byltyr sáýir aıynda Aqtaý qalasy 4a shaǵyn aýdany tusynda teńiz jaǵalaýynda sýǵa túsýge tyıym salynǵan aýmaqta úgit-nasıhat jumystaryn júrgizý kezinde bas qutqarýshy Quralbaı О́serbaıuly sýǵa batyp bara jatqan jasóspirimderdi baıqady. Olar úlken tolqyn saldarynan jaǵaǵa júze almaı, sýǵa bata bastaǵan. Quralbaı dereý qutqarý sheńberin laqtyrǵanmen, jasóspirimder qutqarý sheńberin ustaı almaıdy. О́z ómirin qaterge tikken Quralbaı oılanbastan sýǵa sekirip, eki jasóspirimdi jan-dármenimen sýdan alyp shyǵady. Quralbaı batyrdyń arqasynda 2011 jyly jáne 2016 jyly týǵan eki jasóspirim ajal tyrnaǵynan arashalanyp, otbasyna oralady.
Bul – bas qutqarýshy Quralbaı О́serbaıulynyń basynan ótkizgen qutqarý operasııalarynyń bireýi ǵana. Azamattyq qorǵaý organdarynda 2019 jyldyń maýsym aıynan bastap jumys isteıtin Quralbaı óz eńbegin adal atqarýymen, sýasty izdestirý jumystaryn úzdik atqarýymen tanylyp, óziniń bilikti maman ekenin únemi kórsetip keledi, ıaǵnı qyzmet jelisi boıynsha jumys tájirıbesi mol. Áriptesteriniń aıtýynsha, ol – óziniń tájirıbesin jastarǵa úıretip, ujymnyń qoǵamdyq ómirine belsendi túrde aralasyp júretin ujymǵa syıly maman.
Qıyn sátte ómirin qaýipke tigip, ózgelerge kómektesetin tótenshe jaǵdaı qyzmeti salasy mamandarynyń ár kúni, ár sáti qıyndyqqa toly. Olar eldiń tynyshtyǵyna, damýyna azamattyq úlesin qosyp keledi.
Mańǵystaý oblysy