Qazir qalaǵa ǵana emes, aýylǵa da baryp qalaǵan sport túrimen aınalysýyńyzǵa bolady. Demek, aldaǵy ýaqytta chempıondar alystaǵy eldi mekenderden shyǵyp jatsa, tańǵalmańyz. Taza aýada tynysy ashylyp, densaýlyǵy jaqsarǵan talaı azamatty kórip te júrmiz. Osy maqsatta Jetisý óńirinde ıgilikti ister kóbeıip keledi. Ásirese aýyldyń aqjoltaı azamattary jańadan sport keshenin ashyp, jastardyń jigerin shyńdap jatyr.
Máselen, Eskeldi aýdanyna qarasty Kókjazyq aýylynda blokty-modýldi konstrýksııalardan turǵyzylǵan sport kesheni boı kóterdi. Aýyl balalarynyń armanyna aınalǵan nysan – endi jastardyń quzyrynda. Qalaǵan ýaqytynda baryp, shynyqsa bolady. Tipti arnaıy jattyqtyrýshylar da qyzmet kórsetedi. Ashylý saltanatynda aýdan ákimi Eldos Ahmetov halyqty osynaý qýanyshymen quttyqtady.
«Jastardy damytýǵa baǵyttalǵan mundaı ıgi isterdiń bereri mol. Osyndaı sport nysandarynan álemdik arenalarda top jaratyn chempıondar tárbıelenip shyǵatynyna senimdimin. Sizderdi osy qýanyshty oqıǵamen quttyqtaı otyryp, ár otbasyna beıbitshilik pen amandyq tileımin!», dedi E.Ahmetov.
Jalpy, sport kesheniniń qurylysyna 130 mln teńgeden asa qarjy bólingen. Qurylys jumystaryn «Qaz Damu Construction» JShS oryndady. Eki qabatty ǵımarattyń aýmaǵy – 720 sharshy metr. Munda voleıbol, basketbol, kúres zaldary, sondaı-aq trenajer zaly, dýsh jáne basqa da qajetti bólmeler bar. Saltanatty rásim aıaqtalǵannan keıin shaǵyn voleıboldan alǵashqy jarystar uıymdastyryldy.
Atap ótsek, 2020 jyly Eskeli aýdany Qarabulaq aýylynda dene shynyqtyrý-saýyqtyrý kesheni ashylsa, byltyr О́rqýsaq aýylynda vorkaýty bar shaǵyn sport alańy, al Syrymbet aýylynda dene shynyqtyrý-saýyqtyrý kesheni ashylǵan edi. Endi Kókjazyq aýylyndaǵy sport kesheni qatarǵa qosyldy.
Al Jarkent qalasynda burynǵy qaraýsyz qalǵan mádenıet úıin jeke kásipkerler kúrdeli jóndeýden ótkizip, 120 oryndy jańa ««Daraboz»» sport kesheni retinde ashqan. 53 myńǵa jýyq turǵyny bar shahar jastary úshin bul – úlken múmkindik. Munda oqýshylardan bastap, kez kelgen aýyl azamaty 10 seksııa boıynsha sportpen shuǵyldana alady.
Panfılov aýdany ákimdiginiń málimetine qaraǵanda, buryn 80-jyldardaǵy qaraýsyz qalǵan ǵımaratta Mádenıet úıi bolǵan.
Jarkent qalasy ákiminiń qaýlysymen bul ǵımarat 5 jyl merzimge jergilikti kásipkerler Ilshat Osmanov pen Ashat Býrashovqa senimgerlik basqarýǵa berilgen. Olar 500 mln teńge óz qarajatyn salyp, ǵımaratqa kúrdeli jóndeý júrgizip, barlyq qajetti sporttyq qural-saımandarmen jabdyqtap, sport keshenin ashty.
Endi jalpy aýdany 1 500 sharshy metrdi quraıtyn dene shynyqtyrý-saýyqtyrý kesheniniń ǵımaratynda boks, kúres, dzıýdo, grek-rım kúresi, ústel tennısi jáne basqa da sport túrlerinen 10 seksııa jumys isteıdi. Nysanda bir ýaqytta 120 adam jattyǵa alady. Jańa sport kesheniniń óz ashanasy, jarysqa kelgen sportshylarǵa arnalǵan 16 oryndyq jataqhanasy men sport zaly bar. Sondaı-aq teorııalyq oqytý ortalyǵy jáne basketbol men fýtbolǵa arnalǵan jeke fýtzal alańdary bar. Munda 10 jattyqtyrýshydan basqa jergilikti turǵyndardan taǵy 10 adam jumysqa tartyldy. Osylaısha, 20 jańa turaqty jumys orny quryldy. Jumyskerlerdiń ortasha jalaqy – 100 myń teńge.
«Daraboz» sport kesheniniń ashylý saltanatyna qatysqan aýdan ákimi Marat Saǵymbek mesenattar men jergilikti kásipkerlerge aýdannyń áleýmettik máselelerin sheshýde qoldaý kórsetkeni, óskeleń urpaqtyń densaýlyǵyna qamqorlyq jasaǵany jáne halyqty sportqa tartqany úshin shyn júrekten alǵysyn bildirdi.
Atap ótsek, bul – Panfılov aýdanynda jergilikti mesenattar men kásipkerlerdiń esebinen ashylǵan toǵyzynshy sport kesheni. Sondaı-aq 2023 jyly bıýdjet esebinen Penjim jáne Úlkenshyǵan aýyldarynda sport keshenderi salynyp, paıdalanýǵa berildi. Al Úsharal aýylynda 100 oryndyq taǵy bir jańa sport kesheni salynyp jatyr.
Jetisý oblysy