«Muz ústindegi shahmat» atalyp ketken bul oıynnyń densaýlyqqa paıdasy kóp. Ásirese zerde men zeıinniń jaqsy jumys atqarýyna oń yqpal etedi eken. Kórer kózge jeńil kóringenmen, olımpıadalyq oıyn biraz eńbekti talap etedi. Qýanyshtysy, elimizde kerlıng sportyna qyzyǵýshylardyń qatary kúnnen-kúnge artyp keledi.
Oıyn tarıhy XVI ǵasyrda Shotlandııadan bastaý alǵan. Birde Danbleın toǵany túbinen kerlıng snarıady tabylady. Ondaǵy «1511 jyl» dep qashalǵan jazý bul sporttyń rasynda erte zamannan kele jatqanyn barshaǵa dáleldedi. Osylaısha, buqaralyq sport retinde ǵana tanylǵan kerlıng 1959 jyly Edınbýrgte álem chempıonaty deńgeıinde dúrkirep ótedi. Al 1998 jyldan bastap Olımpııa oıyndarynyń qataryna qosylady.
Qazaqstan Kerlıng federasııasy 20 jyldan beri jumys istep keledi. Osy ýaqyt aralyǵynda 16 qurama komanda jasaqtalyp úlgergen. Erler, áıelder, jasóspirimder men paralımpıadalyq komanda sportshylary Almatydaǵy ulttyq kerlıng ortalyǵynda bas qosyp turady.
Kerlıng – eń demokratııaly oıyn túri. Komanda quramynda 16 jas pen 60 jas aralyǵyndaǵy sportshylar da qatar oınaı alady. Al jattyǵýǵa 5 jasynan kirise berýge bolady. Osyndaı talapty jastyń biri – 16 jastaǵy Mereı Tastemir kerlıngpen 6 jasynan bastap shuǵyldanǵan.
– Men kerlıng seksııasy ashylǵanyn estı sala qyzyǵýshylyq tanyttym. Birinshi jattyǵý kúnimiz erekshe áser qaldyrǵan soń, naqty osy sportpen shuǵyldanamyn dep sheshtim. Daıyndyqtyń nátıjesinde eki jyl buryn Qazaqstannyń jasóspirimder quramasyna qabyldandym, – deıdi ol.
Mereıdiń izimen týǵan baýyry Ibragım de kerlıngpen aınalysady. Aǵaıyndylar Kanvonda ótip jatqan jasóspirimder arasyndaǵy Olımpıadada el namysyn qorǵaýǵa daıyndalyp jatyr.
Kerlıng qaýymdastyǵynyń Bas hatshysy Vıktor Kımniń aıtýynsha, kerlıngte múmkindigi shekteýli jandar úshin de birshama jaǵdaı jasalyp jatyr.
– Qazir bizde estý qabileti nashar jáne arbada otyratyn sportshylar komandasy jasaqtalǵan. Osyǵan oraı Astanada kerlıngshi-paralımpıadashylarǵa arnalǵan stadıon jumys istep tur. Kúrmeýi kóp máseleler aqyryndap oń sheshimin taýyp keledi. Qazir Ulttyq olımpıada komıtetinen bastap, mınıstrliktiń Sport jáne dene shynyqtyrý isteri komıteti tıisti jabdyqtarmen qamtamasyz etip jatyr. Endigi kezekte ınfraqurylym máselesi rettelse, nur ústine nur, – deıdi V.Kım.
Oıyn erejesi – qarapaıym. Tórt adamnan turatyn eki komanda jarysqa túsedi. Muzaıdynynyń ortasynda arnaıy syzylǵan sheńber nysany bolady. Ár komandada – segiz tas. Qatysýshylar kezek-kezek snarıadtardy qolyndaǵy ysqysh arqyly nysanaǵa jaqyndatýǵa tyrysady. Solaısha oıyn jeke sportshynyń emes, tutas komandanyń kombınasııalyq úılesimi arqyly qyza túsedi.
Iá, kerlıng – óz aldyna erekshe sport. Joǵarǵy ıntellekti men myqty densaýlyqty talap etetin oıynda bizdiń de úlesimiz bar. Qazaq sportshylary kerlıngten de keremet nátıje kórsetetine senimimiz mol. Sondyqtan Kanvon qalasyna el amanatyn arqalap ketken muz ústindegi muzbalaqtarǵa sáttilik tileımiz!