Budan deıin Soltústik Qazaqstan oblystyq sybaılas jemqorlyqqa qarsy kúres departamentiniń ótken jyly satyp alý baǵasyn 90 ese asyryp, bıýdjettiń 1,8 mlrd teńgesin orynsyz jumsaǵan zańsyzdyqtardy anyqtaǵanyn jazǵan edik. Antıkordyń ashyq ári ádil qyzmeti qazir el aýzynda.
Jýyrda departament qyzmetkerleri Tımırıazev aýdandyq bilim bóliminiń basshysyn deldal arqyly 1,2 mln teńge para alyp jatqan jerinen ustady. Ol aýdanda bilim berý salasynyń eki ǵımaratyna kúrdeli jóndeý júrgizý tenderin jeńip alǵan merdiger kompanııadan jasalmaǵan jumystyń aktisine qol qoıǵanyn osyndaı kólemdegi qarjyǵa baǵalaǵan. Qazir para berýshi men alýshynyń ústinen qylmystyq is qozǵalyp, ekeýi de tergeý oqshaýlaǵyshynda qamaýda otyr.
«Barlyq aqparatty tergeý jumystary aıaqtalyp, sottyń sheshimi shyqqannan keıin BAQ arqyly halyqqa jetkizemiz. Ázirge qylmystyq is týraly aıtýǵa quqymyz joq», deıdi Antıkor qyzmeti basshysynyń birinshi orynbasary Aıdos Júnisov. Biraq osy is boıynsha tergelgen bilim bóliminiń sharýashylyq meńgerýshisi Antıkordyń tergeýshisinen shyqqan soń ózine-ózi qol jumsamaq bolǵany belgili bolyp otyr. Osy oqıǵa týraly suraqqa A.Júnisov: «Bul isti biz emes, polısııa qyzmetkerleri tergeıdi», dep qysqa qaıyrdy.
Oblystaǵy Antıkor jumysynyń jandana túskenin taǵy bir faktiden kórýge bolady. Sybaılas jemqorlyqtyń aldyn alý jáne onymen kúres isine departament burynǵy jemqorlyqqa qarsy kúres salasy qyzmetkerleriniń tájirıbesin qoldanýdy qolǵa alyp otyr. «Antıkor volonterleri» dep atalatyn bul jobaǵa buryn memlekettik menshiktiń qoldy bolýyna qarsy kúresken qyraǵy azamattar, qoǵamdyq uıymdar, bıznes sýbektileri jáne kvazımemlekettik sektordyń ókilderi qatysady. Qoǵamdyq uıymdy qurýǵa arnalǵan jınalysqa departament basshysynyń birinshi orynbasary Aıdos Júnisov, Antıkor qyzmetkerleri ardagerler keńesi tóraǵasynyń orynbasary Tólegen Tóregeldın jáne burynǵy memlekettik menshikti talan-tarajǵa salýǵa qarsy kúres bóliminiń qyzmetkerleri Sábıt Baıtelenov, Qojahmet Shaıahmetov, Serik Sádýaqasov qatysty.
Uıym múshesiniń biri Qojahmet Shaıahmetov – buryn menshikti urlaýǵa qarsy kúres bóliminde jumys istegen bilikti, tájirıbeli maman. Keńes jyldary mundaı bólimge qazaq azamattary sırek qabyldanatyn edi. Osy qyzmette uzaq jyl mindetin atqarǵan aǵa býyn ókili polkovnık dárejesine deıin jetip, zeınetke shyqty. Antıkorǵa osyndaı azamattardyń tájirıbeleri, jınaǵan bilim-biliktigi óte qajet. «Ardagerlerdiń biliktiligin, tájirıbesin esepten shyǵaryp tastaýǵa bolmaıdy. Kez kelgen qyzmettiń sheberligi jyldar boıy ǵana qalyptasady. Sondyqtan aǵa býynǵa senim artyp, volonter retinde ortaq iske jumyldyrǵysy kelgen departament basshylyǵyna rızashylyǵymdy bildiremin», dedi Tólegen Tóregeldın jıynda.
Osylaısha, Antıkordyń Soltústik Qazaqstan departamentinde volonterlik qyzmet tórt baǵyt boıynsha iske kirispek. Olar – qoǵamdyq baqylaý, jemqorlyqty zerdeleý, kásibı kómek jáne korporatıvtik kómek.
PETROPAVL