Májilis depýtaty Dáýlet Turlyhanov Premer-mınıstrdiń orynbasary Tamara Dúısenovaǵa depýtattyq saýal joldap, urpaq saýlyǵyn oılaýda opynyp qalmaý keregin eskertti, dep jazady Egemen.kz.
«Jastardyń densaýlyǵyna balta shabatyn veıp dep atalatyn elektrondy sıgaretti toqtatýǵa tıym salatyn norma Densaýlyq saqtaý máseleleri týraly zań jobasyna engizildi. Bul - ortaq jeńisimiz. Osy zań boıynsha jumys istegen depýtat áriptesterimizge alǵysymdy bildiremin. Elektrondy temeki, energetıkalyq sýsyn sekildi kóptegen zııandy zattar keńinen taralyp, qoǵamdy ýlap jatyr. Solardyń biri – kalıan. Búginde kópshilik tamaqtanatyn oryndardy qoıyp, jastar kalıandy kólikte de paıdalanýda. Qoǵamdyq oryndarda tartýǵa zań júzinde tyıym bolsa da norma oryndalmaı otyr. О́ıtkeni úsh jyl boıy kásipkerlik sýbektilerin tekserýge moratorıı engizildi. Tekserýdi toqtatý degen zańdy buzýǵa negiz emes. Kalıannyń quramyna ne qosatyny múldem jumbaq. Oǵan gashıshti de, alkogoldik ishimdikti, basqa da zattardy qosýy múmkin, qadaǵalaıtyn eshkim joq», dedi D.Turlyhanov.
Halyqtyń densaýlyǵyn jaqsartý, salaýatty ómir saltyn qalyptastyrýǵa jaǵdaı jasaý memlekettik saıasattyń basym baǵyty degen depýtat jastar arasynda kalıan shegý keń taraǵanyn aıtty. Tutynýshylardyń basym kópshiligi kalıannyń zııany joq dep oılaıtynyna qynjyldy. Kerisinshe, kalıan shegý qaterli isikke, bronhıt, demikpe, ókpeniń sozylmaly syrqatyna, júrek qan tamyrlary aýrýyna da shaldyqtyratynyn eskertti.
Ishki ister mınıstrligi qoǵamdyq oryndarda kalıandy shegýshilerge baqylaýdy kúsheıtip, tutyný zańdylyǵyna tekserý júrgizýi tıis ekenin aıtty. Densaýlyq saqtaý mınıstrligi kalıannyń quramy men tútinine saraptama jasap, zııany týrasynda qorytyndy ázirleý kerek dedi. Kalıan shegýge tyıym salyp, al talapty buzǵandardy jaýapkershilikke tartýdy kózdeıtin zań jobasyn ázirleý qajettigin atap ótti.