«Astana opera» teatrynyń balet ártisi Qýat Káribaev Reseıde ótken «Odısseıa-Arts» halyqaralyq kópjanrly art-olımpıadanyń «Horeografııa» atalymynda I dárejeli laýreat atandy.
Art-olımpıadanyń uıymdastyrýshylary daryndy ónerpazdyń Kreml saraıynda qoıylǵan B.Asafevtiń «Baqshasaraı burqaǵy» atty baletindegi ónerine tánti bolyp, oǵan baıqaýǵa qatysýǵa usynys bildirgen.
«Festıvalǵa A.Adannyń «Korsar» baletinen pa-de-de nómirin alyp bardym. Buǵan sahnadaǵy seriktesim, balet ártisi Gúlnaz Janaeva ekeýmiz bar kúshimizdi salyp, daıyndaldyq. Árıne, jeńiske jetkenimizge qýanamyn. Bul bizdi shabyttandyrady. Marapattaýdan keıin uıymdastyrýshylar bizdi Chelıabınskide ótetin baıqaýdyń gala-konsertinde óner kórsetýge shaqyrdy», dedi ol.
Sondaı-aq Q.Káribaev óz shyǵarmashylyǵynda «Astana opera» balet trýppasynyń kórkemdik jetekshisi, Reseıdiń halyq ártisi Altynaı Asylmuratovanyń orny erekshe ekenin aıtty. «Altynaı Ábdýahımqyzynyń qamqorlyǵy meniń ómirimdi túbegeıli ózgertip, jańasha serpin berdi. Sol kisiniń arqasynda ónerde ózimdi tanyta aldym. Aıtsam dep armandaǵan kóptegen jańa partııany oryndadym. Sonyń bári meni qanattandyrdy. Qazir eki ese shabytpen jumys istep jatyrmyn», dedi baıqaý laýreaty.
Aıta keteıik, atalǵan art-olımpıada «Bilim, mádenıet jáne ónerdiń kópultty qoǵamdy damytý faktory retindegi ıntegrasııasy» atty halyqaralyq ashyq forýmy aıasynda uıymdastyryldy. Is-sharanyń maqsaty – túrli mádenıet pen ult ókilderin biriktirý.