Qostanaı oblystyq tarıhı-ólketaný mýzeıinde ataqty qylqalam sheberi Ábilhan Qasteevtiń jurtshylyqqa beımálim sýreti saqtalǵan. Onda halyq batyry Amangeldi Imanovtyń serigi Ábjan Turmanovtyń portretin salǵan.
Atalǵan mýzeı dırektorynyń orynbasary Elmıra Alshymovanyń aıtýynsha, bul eńbek murajaı qoryna 1960-jyldary tapsyrylǵan. Kim ótkizgeni belgisiz. Sýrettiń astyna «Á.Qasteev (1904-1973) Qazaq KSR-niń halyq sýretshisi. Ábjan Turmanov. Amangeldiniń maıdandas serigi. 1950 q.,k., 20h29», dep jazylǵan.
1936 jyly 1916 jylǵy ult-azattyq kóteriliske 20 jyl toldy. Osy dataǵa baılanysty A.Imanovtyń portretin salý týraly respýblıka basshylyǵy sheshim shyǵaryp, ony Ábilhan Qasteevke júktedi. Sóıtip, sýretshi 1939 jyly batyrdyń beınesin salýǵa kiristi. 1940 jyldyń jazynda ol Torǵaıǵa baryp, bas sardardyń sarbazdarymen, týystarymen kezdesip, árqaısysymen jeke-jeke áńgimelesedi. Batyrǵa uqsaıdy-aý degen 30 adamnyń portretin salyp, 40-qa jýyq etıýd, detal jasaıdy. Biraq birinshi salǵan sýretine avtordyń kóńili tolmaıdy. 1941 jyly sardar beınesin ekinshi ret bederleıdi. Buǵan da qanaǵattanbaıdy. 1943 jyly salǵan úshinshi sýreti batyr beınesin dál keltirgendeı bolady. Osy jyly Almatydaǵy Abaı atyndaǵy opera jáne balet teatrynda sýretshilerdiń kórmesi ótip, oǵan Á.Qasteev Amangeldiniń sońǵy salǵan sýretin ákeledi. Kórmeni kórýge kelgen qoǵam qaıratkeri Álibı Jangeldın dosynyń sýretine qarap: «Myna beınege qarap, dosymdy eske alyp turmyn. Sýrettegi beıne Amangeldiniń ózine uqsaıdy. Kelbeti, minez bitimi, tıptik ereksheligi – kádimgi ómirdegi Amangeldiniń ózindeı», dep tánti bolypty.
Qysqasy, áıgili sheber 40- jyldary Torǵaıǵa A. Imanovtyń sýretin salýǵa barǵanda, sonda sardardyń serigi Á. Turmanovpen kezdesip, sonda onyń portretin salǵan-aý dep topshylaımyz.
Endi sýret keıipkeriniń ómir joly týraly aıta keteıik. 1948 jyly mal sharýashylyǵyn órkendetýge qosqan úlesteri úshin Qostanaı oblysynyń sol kezdegi Torǵaı jáne Amangeldi aýdanynan 19 adam Sosıalıstik Eńbek Eri ataǵyn alǵan. Solardyń biri – Jangeldın aýdanyndaǵy «Qyzylqoǵa» kolhozynyń aǵa shopany Ábjan Turmanov. Ol 1947 jyly bekitilgen 606 bas analyqtan 730 qozy alyp, memlekettik joǵary marapatqa ıe bolǵan. Sol jyldary jaryq kórgen oblystyq «Bolshevıktik jol» (qazirgi «Qostanaı tańy») gazetinde «Ábjan qazirde burynǵydan da zor tabystarǵa jetý úshin kúresip júr. Ol qazir óz qaraýyndaǵy qoıdy 2400-ge jetkizdi. Ábjan ústimizdegi jyly árbir 100 saýlyqtan 115 qozy alýǵa mindettengen edi. Bul mindettemesin abyroımen oryndap shyǵyp otyr. Bul fermada qoıdan bıyl jún de jyldaǵydan artyq qyrqyldy. Ekinshiden, fermanyń qysqa daıyndyǵy da aıtarlyqtaı. Ábjan bul tabystarǵa qanaǵattanyp otyrǵan joq, mal basyn áli de ósire bermek», dep jazylǵan maqala basylǵan. Sardardyń serigi bolǵan ozat shopan 1967 jyly dúnıeden ozǵan. Keıin týǵan aýylynyń ortalyǵyna músini ornatylǵan.