Petropavldyń jylý júıesi ataqty «SevKazEnergo» AQ-tyń bir butaǵy «Petropavldyń jylý júıeleri» (PJJ) JShS tolyǵymen basqanyń basqarýyna berilgen. Basqasha aıtqanda, bári jekemenshikte. Atyshýly 2-JEO da solardyń ıeliginde. Dúnıe jekemenshiktiki bolǵan soń jergilikti ákimdik olardyń jumysyna aralaspaıdy, tek apat bolyp, jylý berilmegende ǵana halyqtyń qalaýymen daýys kótergen bolady.
Kózben kórgen dúnıeni ǵana aıtsaq, jeltoqsannyń ortasynda bolǵan 40 gradýstyq aıazda S.Muqanov kóshesindegi «Muhammed meshiti» men «Oblystyq balalar aýrýhanasynyń» arasyndaǵy jylý qubyry jarylyp, PJJ jumysshylary saqyldaǵan sary aıazda sony jóndep jatty. Úıimiz jaqyn bolǵan soń keshke baryp kórsek, jumysshylar qubyrdy aýystyrǵanymen, ony kómbeı, jalańash tastap ketken. Shamasy úlgermegen bolýy kerek, ertesine syrtyn qaptaıtyn shyǵar dep oılaǵanbyz. Alaıda sol qubyr, mine, bir aıdan asty, áli kúnge qaptalmaı, dalany «jylytyp», býy burqyrap sol kúıi jatyr. Áleýmettik jelilerge sýretin kórsetip, birneshe ret saldyq, tipti qalalyq ákimdik bilmegen shyǵar dep olarǵa da habarladyq. Selt etken jan bolǵan joq. Al jylýdyń aýaǵa ketken artyq shyǵynyn jekemenshik kompanııa turǵyndardan óndireri sózsiz.
Osyndaı jaǵdaıdan keıin qalalyq ákimdiktiń elge, halyqqa, memleketke qanshalyqty jany ashıtynyn kóre berińiz. Serik Muhamedıevtiń Ǵ.Músirepov aýdany ákimi bolyp júrgen jerinen qalaǵa aýystyrylǵanyna bir jylǵa jýyqtady. Biraq bir belsendi qyzmetin kórgen emespiz, aman-esen zeınetke shyǵýdy ǵana oılaıtyn sııaqty. Obaly ne kerek, burynǵy ákim Bolat Jumabekovti qalany aralap, uńǵyl-shuńǵylǵa nazar aýdaryp, jaıaý júrgenin jıi kóretin edik. Jumys istegenniń nátıjesi de bolady ǵoı, onyń kezinde qoqys ta shyǵarylatyn, qar da tógiletin, qubyr da óte sırek jarylatyn. Al S.Muhamedıev kelgeli turǵyndar qoqystyń tasylmaıtynyna, qardyń shyǵarylmaıtynyna jıi shaǵym aıtady. Tikeleı bolmasa da, ákimniń jiti baqylaýy bolmaǵan soń qubyrlar da jıi jarylady. Kúni keshe Nazarbaev kóshesi 154-úıdiń tusyndaǵy ystyq sýdyń qubyry jarylyp, burqyraǵan bý aspanǵa atty. Sonyń kesirinen PJJ Jumabaev kóshesindegi – 4, Nazarbaev kóshesindegi – 6, «Kazahstanskaıa pravda» kóshesindegi – 1, Abaı kóshesindegi – 11, Bostandyq kóshesindegi – 3, Internasıonal kóshesindegi – 4, Pıoner kóshesindegi – 6, Sovet kóshesindegi – 2, Pýshkın kóshesindegi 1 kópqabatty úılerge qubyr jóndelgenshe jylý berilmeıtinin habarlady. Uzyn sany 28 kópqabatty úı, bir balabaqsha, birneshe jekemenshik úı jylýsyz qaldy. Áıteýir osy kúnderi qatty aıaz joq, áıtpese turǵyndardyń, ásirese jas balasy men kárisi bar úılerdiń kórgen kúni qarań.
PJJ 200 mm qubyrdyń zaqymdalǵanyn aıtyp, keshki saǵat 20.00-ge deıin jóndeletinin habarlady. Biraq kúni boıy ańyraǵan úıde otyrý ońaı emes.
Eski qubyrlardyń jarylýy tabıǵı qubylys bolsyn-aq, biraq jergilikti bıliktiń olardy qadaǵalaýy, múmkindiginshe jekemenshikten jumystyń jitiligin talap etý kerek qoı. S.Muqanov kóshesindegi joǵaryda aıtylǵan qubyrdyń qaptalmaýyna PJJ ǵana emes, ákimdiktiń de kináli ekendigi sózsiz. Eger qubyrlar tehnologııaǵa saı kútilip otyrsa, jarylys ta az bolar edi.
PETROPAVL