2022 jyldyń 11 aqpanynda Úkimet basshysy bolyp taǵaıyndalǵan Álıhan Smaıylov atalǵan qyzmetti 2 jyl atqardy. Kúni keshe Prezıdent Álıhan Ashanuly bastaǵan Úkimet quramynyń qyzmetin toqtatý týraly Jarlyqqa qol qoıdy, dep jazady Egemen.kz.
Premer-mınıstr qyzmetten ketýine qatysty túsinikteme berdi. Ol, eń aldymen, osy qyzmetti senip tapsyrǵan Memleket basshysyna alǵys aıtty.
«Prezıdent Qasym-Jomart Kemeluly Toqaevqa syndarly ýaqytta Qazaqstan Respýblıkasynyń Úkimetin basqarýǵa senim bildirgeni úshin zor alǵysymdy bildiremin. О́tken eki jyl qoǵam úshin sheshýshi kezeń boldy. Memleket basshysy jańa Ádiletti Qazaqstandy qurýǵa baǵyttalǵan asa mańyzdy saıası jáne ekonomıkalyq reformalarǵa bastamashylyq jasady», dedi Álıhan Smaıylov.
Sondaı-aq Álıhan Smaıylov ózi Úkimettiń tizginin ustaǵan keıingi eki jylda atqarylǵan sharýalardy qorytyndylady.
«Úkimet osy reformalardy iske asyrý jáne elimizdiń turaqty áleýmettik-ekonomıkalyq damýyn qamtamasyz etý úshin qyzmet etti. Úkimet pen jergilikti atqarýshy organdardyń birlesken jumysynyń arqasynda birqatar nátıjege qol jetkizildi. О́tken jyldyń qorytyndysy boıynsha ekonomıkanyń ósýi 5,1%-ti qurady. Barlyq negizgi sektorlar oń damý dınamıkasyn kórsetti. Inflıasııa eki esege tómendetildi. Elimizge tartylǵan tikeleı sheteldik ınvestısııalar kólemi eki jyl qatarynan sońǵy onjyldyqtaǵy eń joǵary kórsetkishterdiń biri boldy. Onyń jyldyq kólemi 26-28 mlrd dollardy qurady. Ulttyq qordyń aktıvteri byltyr 4 mlrd dollarǵa ósip, 60 mlrd dollardan asty. Reıtıngtik agenttikter ulttyq ekonomıkanyń táýelsiz reıtıngi men ınvestısııalyq senimdiligin rastady», dedi ol.
Álıhan Smaıylov birge qyzmet atqarǵan áriptesterine, depýtattarǵa, el damýyna úles qosyp júrgen barlyq azamatqa alǵys aıtty.