Oblystyń barlyq aýmaǵyna bıyl qar kóp jaýdy, al shet aýmaqtaǵy Ǵ.Músirepov aýdanynda tipten qar qalyń. Bul jaqtyń ormandary az bolǵandyqtan boraǵan qar kóbinese joldarǵa úıiledi. Sondyqtan munda tek qýatty tehnıkalarmen ǵana jol arshylady. Uıytqyǵan borannan turyp qalǵan jeńil mashınalardyń ústinen qar júrip ketken jaǵdaılar da jıi kezdesip turady.
Jýyrda osy aýdannyń turǵyny Araı Jańatýǵanova jeńil mashınasymen jalpy 6 adam bolyp kele jatyp qalyń qarǵa turyp qalyp, qatty qıyndyq kóredi. Olardyń ishinde segiz aılyq bóbek te bolǵan. Sodan jolda qalǵan mashınanyń peshi de isten shyǵady. Áıeldiń aıtýyna qaraǵanda, olarǵa kómekke polısııa qyzmetkerleri kelip qana ajaldan qutqarǵan. Qıyn jaǵdaıda qalǵan adamdardyń habary jetken boıynda patrýldik polısııa batalonynyń qyzmetkerleri Saıran Smaǵulov, Rızabek Ersaıynov, Qaırat Orazbekov jáne Damır Ábdirahmanov jol paıdalaný ýchaskesi jáne «Nejınka-Erke» JShS tehnıkalarynyń kúshimen adamdardy ajaldan qutqaryp, alǵys aldy.
Al myna oqıǵa keshe ǵana boldy. Aýdan ortalyǵy Novoıshımka selosyndaǵy №16 órt-qutqarýshylar bólimine aýdannyń alys aýyldarynyń biri Tahtabrodtyń ákimi habarlasyp, 67 jastaǵy bir adamnyń qatty qysylyp, ólim aýzynda jatqanyn jetkizedi. Ony dereý aýdan ortalyǵyndaǵy aýrýhanaǵa jetkizbese, jan tapsyratyny belgili bolady. Tahtabrod pen Novoıshımkanyń arasy – 150 shaqyrymdaı jer. Joldy boran jaýyp tastaǵan. Naýqasty aýyldan alyp shyqqan jedel járdem mashınasyn saǵatyna 40-50 shaqyrymdyq qana jyldamdyǵy bar Vıktor Cherevıktiń K-701 traktory aýdanǵa jetkizgenshe keminde úsh saǵat ótpekshi. Osyny eskergen aýdandyq TJ bóliminiń bastyǵy, azamattyq qorǵaý podpolkovnıgi Sanat Muqashev traktordyń aldynan jol talǵamaıtyn «TREKOL» kóligin jiberedi. Júrgizýshi Eldar Qurmanovtyń qasyna ózi jáne E.Tóregeldınov otyryp, adamdy ajaldan qutqarý úshin alyp tehnıka Tahtabrodtyń jolyna túsedi.
«Jolǵa turyp qalǵan qar qatty ári qalyń eken, jel taqyrlap tastaǵan keıbir ashyq jerler kóktaıǵaq, onyń ústine búıirden qatty daýyl uryp turdy. Soǵan qaramaı múmkindigi bolǵan barlyq jyldamdyqty qosyp, Tahtabrodtan shyqqanyna 20 shaqyrymdaı bolǵan traktormen kezdesip, naýqasty mingizip alyp, tańǵy saǵat 05.50-de aýrýhanaǵa jetkizdik», deıdi Sanat Muqashev.
Aýrý adamǵa birden operasııa jasalyp, ajaldan qalypty.
Osynyń aldynda ǵana, bir kún buryn kórshiles Tımırıazev aýdanynda da qarǵa batyp, onyń ústine benzıni bitip, turyp qalǵan «Gazel» kóliginiń de júrgizýshisi qutqarylǵan edi. Avtokólik Moskvoresk aýylynan Tımırıazev selosyna shyǵyp, 7 km júrgen soń turyp qalǵan eken. Tisi-tisine tımeı jaýraǵan jas jigitti aýdandyq tótenshe jaǵdaılar bóliminiń jigitteri «Nıva-Brontomen» súıregen boıy aýdandyq qonaqúıdiń aldyna bir-aq jetkizdi.
Mine, Soltústikte de qoıannyń qysy osylaı álek salýyn qoımaı tur.
Soltústik Qazaqstan oblysy