Senat Spıkeri Máýlen Áshimbaevtyń tóraǵalyǵymen Palata janyndaǵy Jas sarapshylar klýbynyń otyrysy ótti. Klýb aıasyndaǵy bıylǵy alǵashqy kezdesý jahandyq úrdisterdi eskere otyryp, Qazaqstannyń strategııalyq josparlaý máselelerine arnaldy. Is-sharaǵa Strategııalyq josparlaý jáne reformalar agenttiginiń tóraǵasy Jandos Shaımardanov qatysty, dep jazady Egemen.kz joǵarǵy Palatanyń baspasóz qyzmetine silteme jasap.
Klýb otyrysyn ashqan Máýlen Áshimbaev Memleket basshysy Qasym-Jomart Toqaev óziniń Joldaýynda jáne Úkimettiń keńeıtilgen otyrysynda strategııalyq josparlaý boıynsha negizgi mindetterdi belgilep bergenin atap ótti. Elimizde áleýmettik damý jáne bıýdjettik-salyq saıasaty máselelerin qaıta qaraý, jańa ınvestısııalyq kezeńdi bastaý, ekonomıkany yryqtandyrý, sondaı-aq, ınfraqurylymdy jedel jańǵyrtý jónindegi mindetterdiń mańyzy zor ekenin málim etti.
«Prezıdent Qasym-Jomart Toqaev Úkimetke 2029 jylǵa qaraı ekonomıka kólemin eki ese arttyrý jóninde naqty mindet júktedi. Ekonomıkanyń barlyq salasynda keshendi jumys júrgizbeı atalǵan maqsatqa qol jetkizý múmkin emes. Bul rette memlekettiń ekonomıkaǵa aralasýynan kezeń-kezeńmen bas tartý erekshe mánge ıe. Memlekettik satyp alý boıynsha jańa zańnama qalyptastyrý, memleket pen jekemenshik seriktestiktegi tyń tásilder jáne jekeshelendirý sııaqty qadamdar da úlken ról atqarady. El ekonomıkasyna ınvestısııa tartý boıynsha da aýqymdy mindetter tur», dedi M.Áshimbaev.
Palata Spıkeri eldegi qolaıly ınvestısııalyq ahýaldy saqtaýdyń mańyzdy ekenine de nazar aýdardy. Memleket basshysy atap ótkendeı, bul – jańadan qurylǵan Investısııalyq shtabtyń basty mindeti. Osy baǵytta ınvestorlar, ortalyq jáne óńirler arasyndaǵy baılanysty nyǵaıtýǵa basa mán beriledi.
Taǵy bir baǵyt – turǵyn úı-kommýnaldyq jáne kólik-logıstıkalyq keshenderdiń ınfraqurylymyn jedel jańǵyrtý. Máýlen Áshimbaev sý resýrstaryn tıimdi paıdalaný máselelerine jáne agroónerkásip kesheniniń negizgi basymdyqtaryna da toqtaldy.
Kezdesýde sarapshylar adamı kapıtaldy damytýǵa, sondaı-aq, naqty jáne ataýly áleýmettik qoldaýǵa erekshe nazar aýdardy. Bul baǵytta bilim berý, densaýlyq saqtaý qyzmetteriniń sapasy men qoljetimdiligin arttyrýǵa basymdyq bere otyryp, áleýmettik salany reformalaý qajettigi aıtyldy.
Is-shara barysynda jas sarapshylar Qazaqstandaǵy strategııalyq damýdyń mańyzdy qyrlaryn talqylady. Klýb músheleri álemdik trendterdi eskere otyryp, ekonomıkany ártaraptandyrýǵa, ómir súrý deńgeıin arttyrýdyń naqty ındıkatorlaryna qol jetkizýge, salaaralyq reformalar júrgizýge jáne ornyqty damýǵa qatysty ózekti máselelerdi de qozǵady.
О́z kezeginde Strategııalyq josparlaý jáne reformalar agenttiginiń tóraǵasy otyrysqa qatysýshylarǵa belsendilik tanytyp, saraptamalyq pikirlerin bildirgenderi úshin alǵysyn jetkizdi. Ol kezdesýde aıtylǵan usynystar aldaǵy jumysta eskeriletinin jáne birlesip jumys isteýge daıyn ekenin de atap ótti.