Jýyrda Aqan seri atyndaǵy Soltústik Qazaqstan oblystyq fılarmonııasynyń estradalyq-sımfonııalyq orkestri Úndistanǵa saparlap, Mýmbaı, Delı, Bangolor, Maısorı qalalarynda qazaq óneriniń jetistikterin kórsetti.
Biz osy óner ujymynyń dırektory Botagóz Aqmaǵambetovaǵa jolyǵyp áńgimelesken edik. Onyń aıtýyna qaraǵanda, gastroldik sapardyń uıymdastyrylýyna Úndistannyń Qazaqstandaǵy elshisi doktor Nagendra Prasat myrza uıytqy bolǵan. Ol Petropavlǵa kelgen saparynda Astanadaǵy úndi mádenı ortalyǵymen baılanysyp, fılarmonııada olardyń bılerin, ıogasyn úırenip júrgen qyzyljarlyq jastarǵa rıza bolyp, olardyń Úndistanǵa da baryp, ónerlerin kórsetýi týraly usynys jasapty. Jańa jyldan keıin Astananyń 35 adamdyq kameralyq hory da Úndistanǵa bara jatqanyn bilgen soń, bizdiń fılarmonııa ujymy da solarmen birge gastroldik saparǵa shyǵady. Úndistan elinde olardyń jol, tamaq shyǵyndaryn qarsy alýshy jaq kótergen. «35 adamdyq orkestrdiń jolsaparyna jetetin qarajatty ózimiz taptyq. Dırıjerimiz Almas Muhıtdınovti toptyń jetekshiligine taǵaıyndadyq. Ár qalada bir konsert qoıdyq. Ony dombyrashymyz Ashat Ǵalıev ashyp otyrdy. Eki shekti dombyradan osynshalyq keremet áýen tógilgeni úndilikterdi tańǵaldyrǵanyn kórip, shattanyp otyrdyq. Fleıtashy qyzymyz Tamara Porfırevanyń sheberligine kórermender barynsha rıza boldy. Basqa da án-kúılerimiz, mýzykalyq oryndaýlarymyz kórermenderdi ábden rıza qyldy. Úndiler bizdiń ónerpazdardan mundaıdy kútpegen sııaqty, barynsha tańǵalyp, qol soqty. Mýmbaı qalasynda osyndaǵy úlken sımfonııalyq orkestrge jetekshilik etip júrgen jerlesimiz Marat Beısenǵalıevpen de kezdestik. Bizdiń konsertterimizge úndilik ánshiler men bıshiler de qosylyp otyrdy. Mýmbaı qalasynda Lakshmınarıan atty ózderiniń mýzykalyq festıvaline bizdiń ónerpazdarymyz qonaq retinde qatysyp, ónerlerin kórsetti. Gazetter bizdiń ónerpazdarymyz týraly «álemdik dárejedegi orkestr» dep maqtap jazǵandaryna qatty qýandyq», dedi ol.
Qazaqstandyq ónerpazdar qazaq, orys, Eýropa elderi jáne úndiniń keń taraǵan kompozıtorlarynyń shyǵarmalaryn oryndady. Sóıtip, úndi halqynyń ónersúıer qaýymy Qazaqstan ónerimen keńinen tanysyp, onyń jetistikterin kórip, mýzykanttardyń ulttyq jáne álemdik aspaptarmen sheber oınaıtyndyǵyna tánti bolǵan. Shyn máninde, «ónerde shekara joq» degen osy shyǵar.
PETROPAVL