Aqpannyń aq tútegi aýyl-aımaqty áp-sátte qarǵa kómip, aıaq alyp júrgisiz qıyn jaǵdaıǵa qaldyrdy. Kúni boıy japalaqtap jaýǵan qardan qala kósheleri de tazartylyp úlgermeı jatyr.
Al Almaty megapolısine taıaq tastam jerde jatqan Talǵar aýdany Qaınar aýyldyq okrýgine qarasty shaǵyn ǵana Kóktal aýylynyń kósheleri tizege jýyq jaýǵan qardan lezde tazartyldy. Oǵan traktor tizgindegen Medet Nurbolattyń qaıyrymdylyǵy men erinbeıtin eńbekqorlyǵy sep bolǵan.
«Jaqsynyń jaqsylyǵyn aıt, nury tasysyn» degen. Aýylymyzdyń turǵyny Medet ári-beri júrgende traktoryna tirkelgen kúregishin túsirip, joldy kúrep ketýdi ádetke aınaldyrǵan. Tehnıkasyna jumsalatyn janar-jaǵarmaıdyń qymbatshylyǵyna qaramastan bul isin ol eshýaqytta puldaǵan emes, «osyny men istep júrmin» degenin estip te kórmeptik. Jańaqurylysta 50 shaqty úı tútin tútetedi. Keıde ózimizdi «aralda» qalǵandaı sezinemiz. Sebebi shaǵyn aýdanǵa kommýnaldyq qyzmet kórsetilmeıdi. Qoǵamdyq kólik te kirmeı, qansha jyldan beri jaıaýlap 2-3 shaqyrym jol júrip, ortalyqqa shyǵamyz. Aýa raıy jaýyn-shashyndy bolǵanda kórer qıyndyǵymyzdy aıtýdan jalyqtyq. Qar jaýǵan saıyn tańbozynan jolymyzdy ashyp ketetin kórshimiz Medet Nurbolatqa turǵyndar dán rıza, únemi alǵysyn jaýdyryp jatady. Keshegi qalyń qardan esik aldyn tazartýdyń ońaıǵa soqpaǵanyn jasyrmaǵan jurt kóshemizdiń kúrelgenine balasha qýandyq. Aýyldyń chatynda Medettiń atyna aıtylǵan alǵys ta qarsha borady», deıdi kóktaldyq Álııa Ábilseıitqyzy.
Turaqty jumysy joq aýyl azamaty menshigindegi kók traktorymen nápaqasyn taýyp, anasyna qolǵabys kórsetip júr. Sóıte júrip, ózi turatyn eldi mekenniń jolyn tazartyp ketýdi artyq jumys sanamaıdy. Jaqsylyq jasaýǵa jany qumar Medet munymen ǵana shektelmeıdi. Tabıǵat tósine shyqsa da shashylǵan qoqys, synǵan shynylardy jınap alyp, kóliginiń júksalǵyshyna tıep, tıisti orynǵa tastaýdy daǵdyǵa aınaldyrǵan eken. Qarapaıym azamattyń qorshaǵan ortaǵa degen qaıyrymdylyǵy men meıirimdiligine dos-jaran, týystary qanyq.
Almaty oblysy