B.Rımova atyndaǵy Taldyqorǵan drama teatrynyń kezekti premerasy kórermenge jol tartpaq. 22-23 aqpan kúnderi jas dramatýrg Jánibek Álikenniń «Kúıeý bala» shyǵarmasynyń jelisi boıynsha sahnalanǵan «Qazaqtyń toıy bitpesin» dramasy teatrsúıer qaýymǵa usynylady.
Búginde qazaq qyzynyń sheteldik azamatqa turmysqa shyǵýy ózekti máseleniń biri. Áleýmettik jelilerden ápke-sińlilerimizdiń qara násildi jigitpen nemese ózge ulttan shyqqan azamatpen otaý qurǵanyn jıi kóremiz. Osy aralas neke máselesi qoıylymǵa arqaý bolǵan. Qazaqta «Qyzdyń ary – eldiń ary» dep beker aıtpasa kerek. Spektaklde mundaı jańashyldyqqa aýyl azamattarynyń qarsylyǵy kórsetiledi.
Avtor aralas neke máselesimen qosa, aktýaldy biraz taqyryptardy kóteredi. Máselen, óskeleń urpaq tárbıesi, ulttyq qundylyqtar, aýyldyń azyp-tozýy, tipti ekonomıkalyq máseleler de qalys qalmaǵan.
Jaqynyn jatqa qımaǵan qazaqtyń búgingi tárbıesimen, mahabbatyn ózge ulttan izdegen qazaq qyzynyń tańdaýy qazirgi qoǵamnyń shynaıy beınesi. Qarakóz qyzdarymyz ben jigitterimiz osy qoıylymnan oı túıip, kóterilgen barsha máselelerdi sheshýge atsalysary sózsiz.
«Aqpan-naýryz aılarynda qatarynan 3 qoıylymdy kórermenge usyný josparlandy. Onyń biri «Taptym-aý seni» ımmersıvti qoıylymy, «Qazaqtyń toıy bitpesin» jáne «Kezdesý men qoshtasý» spektaklderi. Jas dramatýrgtyń qylqalamynan týǵan týyndy «Kúıeý bala» dep atalady. Biraq men onyń atyn ózgertip «Qazaqtyń toıy bitpesin» dep qoıdym. «Qazaqtyń toıy bitpesin» degen sózdiń astarynda qoı ústine boztorǵaı jumyrtqalaǵan zamanda, Jańa Qazaqstandaǵy birlik toıy, ar-namystyń qazaq dalasyna tý tikken toıy bitpesin degen maǵyna jatyr. Qoıylymnyń aıtatyn oıy astarly, kóptegen aktýaldy taqyryptar qozǵalady. Bul týyndy adamnyń oıyn dúr silkindiretin qazaq halqynyń oılandyrý men rýhyn kóterýge, birlikke shaqyratyn týyndy bolar dep oılaımyn. Qazirgi ýaqytta alǵa qoıǵan josparlar óte kóp. Tamyz, qyrkúıek aılarynan bastap halyqaralyq, álemdik deńgeıdegi rejıssıorlermen jumys isteýge kelissóz júrip jatyr. Atap aıtsaq, Londonnan Ovlıakýlı Hodjakýlı, Grýzııa elinen Davıd Mgebrashvılı degen rejıssıor men Tamara Ohıkıan sseografpen jumys isteý josparda tur», deıdi teatrdyń kórkemdik jetekshisi Danııar Bazarqulov.
Atalǵan qoıylym óner ujymy usynǵan 2-shi premera. Buǵan deıin rejıssıor Ramazan Úsenniń «Taptym-aý seni» qoıylymy kórermenniń kóńilinen shyqqan edi.