Árbir azamat – Otan qorǵaýshy. Ol kez kelgen ýaqytta tótennen tóngen jaýdyń betin qaıtarýǵa, eli men jerin dushpannan qorǵaýǵa daıyn bolýǵa tıis. Bul sózimiz eldiń kıberqaýipsizdigin qamtamasyz etetin IT salasy mamandaryna da tikeleı qatysty desek, artyq aıtqandyq emes.
Búgingi ýaqyt shynaıy shaıqastardan góri kıbershabýyldar men soǵystardyń zamany bolyp tur. Vırtýaldy álemdegi shekaramyzdy kún saıyn kirpik qaqpaı qorǵamasa bolmaıdy. Osy oraıda kıberqaýipsizdikke jaýapty sala mamandarynyń biliktiligin únemi kóterip otyrý mańyzdy. «Astana IT University» bilim ordasynyń besjyldyǵyna oraı JOO áskerı kafedrasynyń stýdentteri arasynda ótken «AITU Military CTF» zııatkerlik saıysy da osy maqsatta uıymdastyryldy.
Bul jarys tórt baǵyttan turdy: Web júıeniń osal tusyn tabý, OSINT zertteý júrgizý, PWN bınarlyq osaldyqtardy paıdalaný jáne «Reverse engineering» bastapqy kodyn oqý jáne ony paıdalaný. Sol sııaqty kıbershabýyldar oryn alýy yqtımal uıym úshin shyǵyndar nemese jaǵymsyz saldarlar boıynsha «iskerlik táýekel» oıynynan ótý kerek boldy.
Stýdentterden quralǵan 15 komanda kıberpolıgondaǵy áskerı ınfraqurylymdy «buǵattaýda» baǵyn synap, bıznes táýekelderin zerttedi, sonymen qatar kıberqaýipsizdik boıynsha túrli máseleni sheshti. «Astana IT University» áskerı kafedrasy kıberqaýipsizdik sıkliniń bastyǵy, zapastaǵy polkovnık Talaıbek О́mirzaqov bilim mekemelerinde mundaı jarys birinshi ret ótip otyrǵanyn tilge tıek etti.
– О́tken jyly áskerı kafedra bazasynda kıberpolıgon qurylǵan bolatyn. Sol jerde CTF formatynda kıberqaýipsizdik boıynsha jarystar ótedi. Qatysýshylar aqparattyq qaýipsizdik máselelerin sheshý boıynsha jarysady. Búgingi jarystyń basty maqsaty – stýdentterdi osy baǵyttaǵy praktıkalyq daǵdylarǵa baýlý, – dedi ol.
Jarys qorytyndysy boıynsha jeńimpaz komandalar anyqtaldy. Birinshi orynǵa 2800 upaı jınaǵan «P3NT4GON» komandasy ıe bolsa, 2-orynǵa 2400 upaımen «12» komandasy, al 3-orynǵa 2400 upaı jınap, alaıda qarsylasynan ýaqyt boıynsha utylyp qalǵan «M1GU3L» komandasy taban tiredi.
– «Astana Hub» uıymdastyrǵan jarysqa qatysý meniń alǵashqy tájirıbem bolǵan. Tartysty saıysqa áskerı kafedradaǵy vzvod balalarynan quralǵan komanda bolyp qatystyq. Saıys óte qyzyq boldy. Bolashaqta kıberqaýipsizdik salasynda jumys isteýdi josparlap otyrmyn, – dedi «Astana IT University» áskerı kafedrasynyń birinshi kýrs stýdenti Ánýar Asqarov.
Is-shara «AITU Orchestra» jáne «AITU Music Club» klýbtarynyń konserttik baǵdarlamasymen aıaqtaldy. Zııatkerlik saıys jeńimpazdary gramotalarmen jáne baǵaly syılyqtarmen marapattaldy.