Dımash – óner, Dımash – ańyz. Dara talant sáýlesi álemniń ár túkpirine jetip, ult mereıin ústem etip keledi.
28 aqpan kúni Latyn Amerıkasynda «Andromeda» radıostansasynyń «Dımash ǵalamy» baǵdarlamasynda Dımashtyń «When I’ve Got You» atty jańa áni alǵash ret tyńdarmanǵa jol tartty. Tyńdaýshylar shyǵarmany erekshe unatyp, radıojúrgizýshilerden jańa týyndyny qaıta qoıýdy ótingen.
Universo Dimash («Dımash ǵalamy») baǵdarlamasy alǵash ret týra bir jyl buryn, ıaǵnı 2023 jyldyń 1 naýryzynda elimizde Alǵys aıtý kúni men Naýryz meıramynyń qarsańyna oraı efırge shyqqan edi. Dımash ánderi alǵash ret 7 aqpanda Meksıka radıosynan shyrqalǵan bolatyn. Bul qordaly eńbekti júzege asyryp, uıymdastyrǵan – ánshiniń halyqaralyq Mahabbat Dears fan-klýby. Efırdiń tyńdaýshylar arasynda úlken tolqý men suranys týdyrǵany sonshalyq, Andromeda Radio júrgizýshileri tolyǵymen qazaq ánshisiniń shyǵarmashylyǵyna arnalǵan jańa baǵdarlama jasaýdy uıǵarǵan. «Dımash ǵalamy» atty baǵdarlama qurylǵannan beri efırde 14 epızod jaryq kórip, tyńdarmannyń kózaıymyna aınalyp keledi.