Syrdyń boıynda «Rýhanııat jylynyń» resmı bastalýyna oraı Áıteke bıdiń 380 jyldyǵyna arnalǵan «Ádil sózdiń aldaspany» atty Qyzylorda oblysy men Shymkent qalasy aqyndarynyń arasynda komandalyq aıtys ótti. Atadan mura bolyp qalǵan dástúrli óner sonaý sekseninshi jyldary aldaspandaı jarq etip sahnaǵa qaıta shyqqan sátte Almatydan bastap ár óńirde komandalyq aqyndar aıtysy dáýirlegen bolatyn. Keıinnen umytylǵan osy dástúr araǵa talaı jyl salyp Syr tórinde taǵy bir jańǵyrdy.
Qos óńir ónerpazdaryna aqyn, Qazaqstannyń eńbek sińirgen qaıratkeri Júrsin Erman bastaǵan top qazylyq etti. Tól ónerge janashyr azamat zalǵa kirip kelgende kúlli kórermen ornynan turyp, qol soǵyp qoshemet kórsetti. Aıtyskerlerden bólek, kúıshi, jyrshy, termeshiler jáne dástúrli ánshiler ónerine baǵa bergen alqa quramynda fılologııa ǵylymdarynyń doktory Qoılybaı Asanov, aqyn, fılologııa ǵylymdarynyń kandıdaty Serikzat Dúısenǵazın, aqyn, Mádenıet salasynyń úzdigi Qudaıberli Myrzabekov, dástúrli ánshi, Qazaqstannyń halyq ártisi Ramazan Stamǵazıev, kúıshi, Qazaqstannyń eńbek sińirgen qaıratkeri Janǵalı Júzbaev pen jyrshy-termeshi, Mádenıet salasynyń úzdigi Erbolat Shaldybaevtar boldy.
Qyzylorda oblysy ákiminiń orynbasary Ardaq Zebeshev, oblystyq máslıhat tóraǵasy Naýryzbaı Baıqadamov, kórshi óńir ónerpazdaryn bastap kelgen Shymkent qalasy ákiminiń orynbasary Sársen Quranbek komandalarǵa sáttilik tiledi. Sársen Abaıuly qyzylordalyqtarǵa Shymkent qalasy ákiminiń sálemin jetkizip, alamanǵa arnaıy kelgen Júrsin Ermanǵa kóp aldynda qurmet tanytty. Sóz saıysyn Qazaqstannyń eńbek sińirgen qaıratkeri, Májilis depýtaty Amanjol Áltaı júrgizdi.
«Bıylǵy naýryzdan bastalyp, keler jyly osy ýaqytta túıindeletin mega jobanyń Syr elinen bastaý alyp jatqany tegin emes. Jaqynda ǵana halyqaralyq TÚRKSOI uıymynyń «Úzdik mádenı óńir» atalymyn jeńip alǵan Syr óńiri tek bizdiń memlekettiń ǵana emes, ordaly Orta Azııanyń tórindegi mádenı, rýhanı áleýeti kemeldengen qutty óńir», dedi Amanjol Dúısenbaıuly.
Dala dilmary, óz zamanynyń qabyrǵaly qaıratkeri atanǵan Áıteke bıdiń 380 jyldyǵyna arnalǵan komandalyq aıtystyń tanystyrý úrdisin, súıinshi sózin shymkenttik ónerpazdar tarapynan Batyrhan Baıdanov, syrboıylyq top atynan jas daryn Nóser Aıdosuly oryndady. Aqyndardyń epıkalyq tynysyn, ulttyń oı-órisiniń baıtaqtyǵyn tanytatyn súre aıtysqa Birjan Baıtýov pen Erjan Ámirov shaqyryldy.
Zamannyń bet-beınesin, saıası ahýal men qoǵamdaǵy qubylystardy tilge tıek etken sóz saıysynda qazir syrttaǵy jurt ózine telip alǵan ult tulǵalary jaıly Birjan Baıtýov «aıtys bolǵan jeri de qazaqtiki, qaıtys bolǵan jeri de qazaqtiki» dese, Erjan Ámirov «nasha shekken adamdar azaımaıdy, nasha satqan adamdar ustalmasa» dep búginginiń taǵy bir soqtaly máselesin sóz etti. Qos aqynnyń ónerin baǵalaǵandar Birjan Baıtýovqa 37, Erjan Ámirovke 40 upaı berdi.
Kórermen aldynda shymkenttik Abylaı Bórihanov «Aqyretten hat» atty jyrdy oryndasa, jergilikti ónerpaz Tóleýbaı Bısenbek «Kóruǵlyny» tolǵap, qazylar sheshimimen basym tústi. Túre aıtysta Ánápııa Nurǵalımen sóz saıystyrǵan qyzylordalyq aıtysker Beksultan Orynbasarov alǵa shyqty. Qyz ben jigit aıtysy men án saıysta kórshi óńir ónerpazdary Nurlan Esenqulov pen Turar Álmenovtiń desi basym boldy. Qaıym aıtysta qatar shapqan Meıirjan Jarylqap pen Muhtar Nııazov teń tússe, termeden Erbol Qalmyrzaev qyzylordalyq Ádilhan Qýańbaevtan bir upaı artyq aldy.
Qyzylorda oblysy ákimdigi men «Amanat» partııasy uıymdastyrǵan óner báıgesiniń qorytyndysynda jergilikti komanda alǵa shyǵyp, kelesi aıtysqa joldama aldy. Eki topqa da teńdeı qurmet kórsetilip, ár aqynǵa 500 myń teńgeden syıaqy berildi. Al jyrshy, termeshi, dástúrli ánshi men kúıshilerge 250 myń teńgeden tabystaldy.
Jeńimpaz atanǵan Qyzylorda oblysynyń komandasyna Qazaly aýdany ákimdiginiń Áıteke bıdiń 380 jyldyǵyna taǵaıyndaǵan «Babalar amanaty» atty arnaıy syılyǵy tapsyryldy.
Qyzylorda