Kıprdegi Nıkosııa qalasynda robottehnıkadan halyqaralyq chempıonat ótti. Oǵan álemniń 25 elinen kil myqtylar jınaldy. Solardyń arasynan bizdiń oqýshylar oza shaýyp, chempıonat kýbogin jeńip aldy.
Bul jarysqa respýblıkalyq fızıka-matematıka mektebi, Bilim-ınnovasııa jáne Almatydaǵy M.Bazarbaev atyndaǵy №138 gımnazııanyń oqýshylary qatysty. Olardyń komandasy «Sana Team» dep ataldy. Dúbirli básekede el namysyn Ádil Tursynǵalı, Arnar Dáýletqul, Osman Aqypbek, Aldııar Dáýletuly, Daryn Smaıyl, Abbas Pahrıdın, Asylhan Ybyraı, Ilııas Ashıralın, Aızerek Bolat, Janaıym Sabyrjan, Ǵazıza Kúnǵojına jáne Sholpan Amangeldi sekildi oqýshylar qorǵady.
Úsh kúnge sozylǵan chempıonat qorytyndysynda bizdiń jetkinshekter top jaryp qana bolmaı, «Winning Alliance» basty oıyn júldesi men shyǵarmashylyq oılaý arqyly ınjenerlik kedergilerdi joıýdaǵy «Think Award» atalymyn ıelendi.
«Bizdiń robot týrnırde rekord ornatty. Soǵan erekshe qýandyq. Jarystan alǵan áserimiz mol. Osy úsh kúnde basqa elden kelgen qatysýshylarmen tanysyp, tájirıbe almastyq. Bizge osyndaı múmkindik syılap, qoldaý kórsetken Almaty qalalyq bilim basqarmasy men «Almaty daryny» ortalyǵyna rızashylyǵymyzdy bildiremiz», deıdi oqýshylar.
Aıta keteıik, «Sana Team» komandasy Oqý-aǵartý mınıstrliginiń qoldaýymen «Ustem Foundation» qoǵamdyq qory uıymdastyrǵan «Daryn first Championship» óńirlik chempıonatynda Kıprge joldama alǵan edi.