Aýdanǵa ınvestor nege barmaıdy?

Batys Qazaqstan oblysy ká­sipkerlik basqarmasynyń máli­metine sáıkes, óńirde byltyr ınvestorlardyń kúshimen 45 joba iske qosylǵan eken. Osynyń aıasynda 1 myń ja­ńa ju­mys orny ashylǵan. Jal­py alǵanda 2023 jyldyń qory­tyndysy boıynsha negizgi ka­pıtalǵa salynǵan ınvestısııa kólemi 16,4%-ǵa ósip, 645,6 mlrd teńgeni quraǵanymen, onyń basym bóligi Qarashyǵanaq ken orny arqyly tartylǵan ınvestısııa bolatyn.

«Memleket basshysynyń túr­li deńgeıdegi ákimderge qoıyp otyrǵan eń basty mindettiń biri – elimizdiń myqty ónerkásiptik negizin qa­lyptastyrý jáne eko­no­mı­ka­myz ózimizdi tolyq qamta­masyz ete alatyn jaǵdaıǵa jet­kizý. Sondyqtan oblys ekonomıkasyn odan ári ártaraptandyrý, sonyń ishinde óńdeý salasyn damytý baǵytynda naqty isterdi qolǵa alyp jatyrmyz», deıdi Narıman Tóreǵalıev.

2023 jyldyń qorytyndysyna qaraǵanda oblysta ónerkásip óni­miniń kólemi 3,5 trln teń­geni qurap, 6,6%-ǵa óskeni baı­qalady. Sonyń ishinde óńdeý ónerkásibiniń kólemi 308 mlrd teńgeni qurap, 7,4%-ǵa artqan. О́sim metallýr­gııa ónerkásibi, munaı óńdeý ónim­deri, mashına jasaý, jıhaz, qury­lys ındýs­trııa­sy salalarynda baıqalǵan.

Aqpan aıynda úkimettiń keńeı­tilgen otyrysynda Mem­leket basshysy biraqatar tapsyrma berdi. Onyń ishinde óńirlerge ınvestısııa tartý – asa mańyzdy másele bolyp otyr.

Oblys ekonomıkasyn árta­rap­­tandyrý úshin aldaǵy 5 jyl ishinde jalpy quny 2,4 trln teńge bolatyn 67 ınvestısııalyq joba jos­parlanǵanyn aıtqan óńir basshysy 2024 jyly 100 mlrd teń­gelik 15 jobany iske asyrý jospar­lanǵanyn habarlaǵan bolatyn.

«Bul ınvestısııalyq jobalardy júzege asyrý óńirimizde qosymsha jańa jumys oryndaryn qurýǵa, salyqtyq túsimderdi kóbeıtýge, jańa tehnologııalardy engizýge múmkindik beretin bolady», degen edi jýrnalıstermen kezdesý kezinde Narıman Tóreǵalıev.

Alaıda 12 naýryz kúni shuǵyl jıyn ótkizgen ákim ob­lysqa qa­rasty qalalar men aýdan­dar, bas­qarmalar tarapynan ınvestısııa tartý baǵytyndaǵy jumys baıaý júrgizilip jatqanyn aıtyp, dabyl qaqty. Máselen, aýdan­dardyń jartysynan kóbi jalpy quny 1 mlrd teńgege jet­peıtin ınvest jobalar usyn­ǵan. Onyń ishinde Bókeı ordasy, Qaratóbe, Qaztalov, Shyńǵyrlaý aýdandary usynǵan jobalardyń jalpy quny 205 mln teńgeden de tómen deńgeıde.

Narıman Tóreǵalıev ásirese aýdan ákimderine ınvestısııa baǵy­tyndaǵy jumystardy kú­sheıtýdi tapsyrdy. «Biz naqty is­terdi qolǵa alýymyz qajet», dedi ákim.

Oral qalasy oblys ortalyǵy bolǵanyna qaramastan 2023 jyl­dyń qorytyndysy boıynsha ne­gizgi kapıtalǵa salynǵan jeke ın­vestısııa kólemi 6,8%-ǵa tómen­degen. Bul degenińiz 83 mlrd teńge degen sóz. Sondaı-aq birqatar aýdanda da kórsetkish kóńilden shyqpaıdy.

Oblys basshysy ár aýdan áki­miniń, ár basqarma basshynyń jumysy tikeleı ınvestısııa tartýmen baılanysty bolýy kerek ekenin eskertti.

«Investısııa tartý boıyn­sha jumys júrgizbeseńder, orynda­ryńdy bosatasyńdar. Men kadr­lyq sheshim qabyldaıtyn bolamyn. Naqty jobalar kerek. Nátı­je kerek», dep atap ótti aımaq basshysy.

Batys Qazaqstan oblysyndaǵy aýdandardyń basym bóligi, sonyń ishinde joǵaryda ınvestısııalyq tartymsyz dep atalǵan óńirler negizinen mal sharýashylyǵymen aınalysady. Kóbi oblys orta­lyǵynan shalǵaı jatyr. Mun­da kommýnıkasııa jelileri jetil­megen. Qazaqstan boıynsha sapasy eń tómen joldar da osy oblys­ta. Elektr jelileriniń 80 pa­ıyzy tozǵan. Sońǵy jyldary jol qurylysynda oń ózgeris bolǵanymen, taqtaıdaı jol túsken aýyl sany az. 2024 jylǵa ar­nalǵan jospar boıynsha bıyl Batys Qazaqstan oblysynyń jol­daryn jóndeýge 100 mlrd teń­geden asa qarjy jumsalyp, 502 shaqyrym jol salynbaq. Eger bul meje oryn­dalsa, oblys aýma­ǵynda qa­naǵat­tanarlyq joldyń kólemi 58%-ǵa jetýi kerek.

Batys Qazaqstan oblysy