Er-Rııad qalasynda Qazaqstan men Saýd Arabııa arasynda birlesken ınnovasııalyq hab ashyldy. Bul jańa hab álemdik naryqta óńirlik IT-sheshimder men startaptardy halyqaralyq deńgeıde ilgeriletýge oń áserin tıgizedi.
Halyqaralyq habqa álemniń ekinshi ustazy atanǵan, uly ǵalym Ábý Nasyr ál-Farabıdiń esimi berildi. Habtyń tujyrymdamasy Qazaqstannan Saýd Arabııasyna isker kásipkerler men ınnovasııalyq startaptardy, «Tumar» venchýrlik qorynan bastapqy ınvestısııany, ınkýbasııa jáne akselerasııa baǵdarlamasyn tartýǵa negizdelgen. Sondaı-aq sapaly salalyq bilim men jelilik ózara is-qımyl úshin múmkindikter usyný arqyly olardyń osy óńirge kóshýi men damýyn qoldaıdy.
«Bizdiń startaptar ázirleýde aıtarlyqtaı tájirıbemiz bar. Mysaly, osydan bes jyl buryn Ortalyq Azııa aımaǵyndaǵy jetekshi tehnoparkterdiń birine aınalǵan «Astana Hub» jumysyn bastady. Sondaı-aq biz bul salaǵa «Google», «DraperUniversity», «StartX», «Microsoft» jáne Dúnıejúzilik bank sekildi álemge tanymal seriktesterdi tartyp, eń ozyq sheshimderge jol ashtyq. Innovasııalyq habtyń ashylýy qos el arasyndaǵy baılanysty nyǵaıtýǵa jáne ekonomıkalyq damýǵa sapaly úles qosady dep senemin», dedi Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın.
Bul habtyń 5 jyl ishindegi negizgi qyzmet kórsetkishi, kem degende 3 jańa startapty damytý, startaptarǵa keminde 300$ mıllıon tartý jáne osy startaptar usynatyn 1$ mıllıardtan astam qyzmetti eksporttaý.
«Halyqaralyq hab Ortalyq Azııa men Kavkazdan kelgen startaptarǵa TShSA naryǵyna keńeıtý múmkindigin bere otyryp, Qazaqstannyń venchýrlyq ındýstrııasynyń ınfraqurylymyn tolyqtyrady. Bul degenimiz 493 mln-ǵa jýyq adam. Bizge kórsetken qoldaýy úshin Sıfrlyq damý, ınnovasııalar jáne aeroǵarysh ónerkásibi mınıstrligine rızashylyǵymyzdy bildiremiz. Sonymen qatar «Astana Hub» pen Saýd Arabııasyndaǵy seriktesterimizge de aıtar alǵysymyz zor», dedi «Al-Farabi Innovation Hub» bas dırektory Aslan Sultanov.
Aıta keteıik, byltyr Kalıfornııanyń Palo Alto qalasynda Ortalyq Azııa elderi ókilderine arnalǵan «Silkroad Innovation Lab» ashyldy. Atalǵan hab Ortalyq Eýrazııadan kelgen startaptar men kásipkerlerdi sol eldiń naryǵynda óz kásiporynyn qurýǵa nemese keńeıtýge qoldaý kórsetedi. Sondaı-aq oǵan «Google», «DraperUniversity», «StartX», «Microsoft» jáne Dúnıejúzilik bank sııaqty álemdik seriktester tartylyp, azamattarǵa eń ozyq sheshimge qol jetkizý qamtamasyz etildi.