Prezıdent Qasym-Jomart Toqaev Boao Azııa forýmynyń plenarlyq sessııasynda búginde Qazaqstan men Qytaı qarym-qatynasy tıimdi seriktestiktiń úlgisi sanalady. Elimiz Qytaıdyń Ortalyq Azııadaǵy negizgi saýda-ekonomıkalyq seriktesine aınalǵanyn atap ótti, dep jazady Egemen.kz.
«Qytaıdyń aımaqtaǵy saýda-sattyǵy men salǵan ınvestısııasynyń teń jartysy Qazaqstannyń úlesine tıesili. Byltyr Qazaqstan men Qytaı arasyndaǵy taýar aınalymy 41 mıllıard AQSh dollaryn qurady. Bul – tarıhı rekordtyq kórsetkish. 2023 jyly elderimiz arasyndaǵy júk tasymalynyń kólemi 22 paıyzǵa artyp, shamamen 30 mıllıon tonnaǵa jetti. Osydan on jyldan astam ýaqyt buryn QHR Tóraǵasy Sı Szınpın Qazaqstanǵa jasaǵan sapary kezinde «Bir beldeý, bir jol» aýqymdy megajobasyn tanystyrǵan bolatyn. Atalǵan joba Shyǵys pen Batys arasyndaǵy negizgi kópir qyzmetin atqarady, al Qytaıdan Eýropaǵa qurlyq jolymen tasymaldanatyn júktiń 80 paıyzy Qazaqstan aýmaǵy arqyly ótedi. Bul mańyzdy artyqshylyqty biz tolyqqandy paıdalanýǵa tıispiz. Bizdiń óz ınvestısııamyz da «Bir beldeý, bir jol» bastamasymen strategııalyq turǵydan sabaqtas ári zamanaýı, mýltımodaldy, ekologııalyq turǵydan qaýipsiz jáne ornyqty ınfraqurylym qurýǵa baǵyttalǵan», dedi Prezıdent.
Qasym-Jomart Toqaev óz sózinde elimizdiń jańa ekonomıkalyq baǵytyna aıryqsha nazar aýdardy.
«Byltyr elimizdiń ekonomıkalyq ósimi 5,1 paıyzdy qurady. Bul álemdik ekonomıkanyń boljamdy damý qarqynynan shamamen eki ese kóp. Biz ortamerzimdi perspektıvada ekonomıkanyń ósimin keminde 6 paıyz deńgeıinde ustap turýdy jáne 2029 jylǵa qaraı onyń kólemin eki ese ulǵaıtýdy josparlap otyrmyz. Osy maqsatqa qol jetkizý úshin men jańa ekonomıkalyq baǵytty jarııaladym. Bul bastama kúshti ári qarqyndy damyǵan memleket qurýǵa baǵyttalǵan qurylymdyq reformalardy júzege asyrýdy kózdeıdi. Qazaqstandaǵy ashyq esik saıasaty, mol resýrstar jáne lıberaldy naryqtyq reformalar kóptegen sheteldik, sonyń ishinde qytaılyq kompanııalardyń da nazaryn aýdardy. Osy oraıda biz azııalyq seriktesterimizdi ekonomıkamyzǵa ınvestısııa quıýǵa, ózara tıimdi yntymaqtastyqtyń jańa baǵyttaryn qarastyrýǵa shaqyramyz», dedi Prezıdent.