Sý tasqyny saldarynan Amangeldi jáne Jangeldın aýdandaryndaǵy eldi mekenderdiń kóbi uıaly baılanyssyz qalǵan. Búgin Qostanaı oblysynyń ákimi Qumar Aqsaqalov zardap shekken óńirlerdegi baılanysty qalpyna keltirý jumystary júrip jatqanyn málimdedi.
«Biz uıaly baılanys operatorlaryna júgindik, olar turǵyndardy baılanyspen jáne ınternetpen qamtamasyz etý úshin jedel kómekke keldi», dedi Q.Aqsaqalov.
«Tele2» jáne «Bılaın» kompanııalarynyń jedel is-qımyldarynyń nátıjesinde aýdan ortalyqtary Amangeldi men Torǵaıda uıaly baılanys iske qosyldy. Sondaı-aq Amangeldi aýylynda «Ksell» AQ baılanys operatory baılanys ornatty, Torǵaı aýylyn «Ksell/aktıv» mobıldi ınternetimen qamtamasyz etý máselesi pysyqtalyp jatyr.
Amangeldi jáne Jangeldın aýdandary jaryqsyz qalǵanda «Qazaqtelekom» AQ tehnıkalyq qyzmetkerleri táýlik boıy kezekshilik atqaryp, dızel-generatorlarynyń kómegimen turǵyn úıler men ózge de ǵımarattardy elektr qýatymen qamtamasyz ete aldy.
Máselen, telekom-operatorynyń kúshimen oblys ortalyǵynan 600 km qashyqta ornalasqan Ekidiń aýylynda stasıonarlyq baılanys iske qosyldy. Qazirgi tańda baılanys nysandarynda sý sorǵytý jumystary júrip jatyr. Telekom-operator baılanys nysandaryn sý basý qaýpiniń aldyn alý maqsatynda apat aımaǵyna qosymsha kúsh-qural jóneltilgenin málimdedi.
«Qazirgi tańda Amangeldi aýylynda «Tele2», «Bılaın», «Ksell/aktıv» uıaly baılanysy jumys istep tur. Osydan 20 mınýt buryn Torǵaı aýylynda «Bılaın» baılanysyn iske qostyq. «Tele-2» baılanysyn túnde qosqanbyz. Búgin Qostanaıdan 2 dızel stansııasy shyqty. Keshke deıin «Ksell/aktıv» uıaly baılanysyn qosýǵa tyrysamyz», dedi «Qazaqtelekom» AQ ókili.
Qostanaı oblysy