О́tken jyldyń jeltoqsan aıynda Meńdiqara aýdanynda qurǵaq saýmal shyǵaratyn zamanaýı ferma iske qosylǵan. Onda jylqy súti nemis tehnologııasy arqyly tereńdete óńdeledi. «S-Agro-Borovskoe» jaýapkershiligi shekteýli seriktestigi qurǵaq saýmaldy mamyr aıynda saýdaǵa shyǵarýdy josparlap otyr.
Atalǵan seriktestik pen nemistiń «Zollmann Stutenmilch GmbH» kompanııasy taıaýda taǵy bir jańa jobany qolǵa almaq. Qos tarap Qostanaı oblysynda tabıǵı kosmetıka shyǵaratyn óndiristik jelini iske qosý týraly kelisimge kelip otyr.
«Nemis kompanııamen áriptestik aıasynda jumys istep jatqanymyzǵa eki jyldan asty. О́tken jyly óndiristik seh, ákimshilik ǵımarat paıdalanýǵa berildi. Salqyndatqysh tankter, pasterızator, 100 lıtrlik sýblımator, saýý júıesi iske qosyldy. Bolashaqta jylyna 40 tonnaǵa deıin ónim óndirýdi kózdep otyrmyz. Ferma 150 adamdy turaqty jumyspen qamtıdy. Jobanyń jalpy quny – 10 mlrd teńge. Taıaýda Berlın qalasynda kompanııa basshysy Gans Solman myrza ekeýmiz áý basta oılastyrylǵan kelisimsharttyń ekinshi kezeńine qol qoıyp, jobany júzege asyrý merzimin uzarttyq. Osylaısha, osy jyldyń úshinshi toqsanynda bıe sútinen organıkalyq kosmetıka zattaryn jasap shyǵaratyn birlesken óndiristi iske qosaıyq dep jatyrmyz. Solman myrza kelisimshartqa qol qoıyp jatqan kezde qymyzdyń otany bolyp sanalatyn Qazaqstannyń bıe sútin óńdeýge eń qolaıly el ekenin aıtty. Men de ol kisiniń osy sózin qoldaımyn. Sondyqtan eki tarap bolyp birlesip qolǵa alyp jatqan jobamyzdyń jemisti bolatynyna esh kúmán joq», deıdi «S-Agro-Borovskoe» JShS dırektory Meıram Ahmetjanov.
Seriktestik basshysynyń aıtýynsha, ferma untaqtalǵan qurǵaq saýmaldyń halyqaralyq sertıfıkaty men jańa ónimniń halyqaralyq sapaǵa sáıkes keletini týraly deklarasııa alǵan.
«Biz alǵashqy ónimdi shyǵardyq. Biraq ony satýǵa jibermeımiz, aldymen ózimizdiń sheteldik jáne otandyq áriptesterimizge, dıstrıbıýterlerimizge úlestirip beremiz. Olar ónimmen tanysyp, óz taldaýlaryn jasaıdy. Al mamyr aıynda qurǵaq saýmaldy resmı túrde saýdaǵa shyǵaramyz. Ol untaq túrinde bolady. Sonymen qatar biz kapsýlaǵa salynǵan qurǵaq saýmal shyǵaryp kórmekpiz. Basty maqsatymyz – qazirgi jańa tehnologııa men ata-babamyzdan mura bolyp qalǵan kásipti ushtastyryp, qazaq qymyzynyń dámi men qasıetin halyqaralyq deńgeıde tanytý. Saýmal adam densaýlyǵyna paıdasy mol qasıetke ıe, sondyqtan aldaǵy ýaqytta balalar men sportshylarǵa arnalǵan ónimderdi de shyǵarý oıda bar», deıdi M.Ahmetjanov.
Qostanaı oblysy