Bir jetiden beri qazaqtyń Uly dalasy telegeı tasqyn ákelgen tabıǵattyń kózsiz apatymen alysyp, esimiz – ekeý, túsimiz tórteý bolyp jatqan aýyr, azapty kúnderdiń birinde Astanadan arqamyzdy aıazdaı qaryǵan sýyq habar keldi... Janymyzdy jabyrqatty...
О́mirbek Baıgeldi esimdi alyp júrekti, abyz oıly aǵamyz myna jaryq jalǵanmen qoshtasypty...
О́tken ǵasyrdyń sekseninshi jyldary...
Marqum Nesipbek Dáýitaev telefon soǵyp: «Áı, qurdas, bizdiń Qordaıdyń kózi ashylatyn boldy... Aýdanymyzǵa myqty basshy keldi. Sózimen eldi uıytyp, isimen halqyn yrza qylatyn О́mirbek atty aǵamyz keldi!..» degeni esimde... Áýeli, ózinen buryn qolyna qalam ustaǵan qaýymǵa О́mekeńniń sóz sóılese «alystan sermep, jaqynnan terbep», baıaǵynyń bılerindeı aǵyl-tegil oıyn emin-erkin jetkizetin sheshen tili men kósem minezi týraly ańyzy jetti. Ádebıet pen óner týraly, el tarıhy men qoǵam minezi jaıynda aıtqandaryn jıi-jıi estip júrdik... Isi men sózi úılesken, halyq júregine jol tapqan qaıratker tulǵa, oblysqa birinshi basshy boldy. О́mekeń týraly maǵan tamsanyp, sóz aıtqan ekinshi adam – qazaqtyń zańǵar bitimdi uly jazýshysy Ábish Kekilbaev. «Kóne Tarazdyń tarıhyna til bitirer tulǵaly azamattyń oblys tizginin ustaǵany oryndy boldy. О́mirbek – zamana rýhyn tap basyp tanıtyn qaıratker tulǵa! Taǵlymy men tálimi, bilimi men biligi mol azamat!» dep edi Ábekeń...
Syrttaı aty men ataǵyna qanyqqan ákim aǵamyzben jaqyn tanysý múmkindigi 1990 jyldyń kókteminde, Qazaq KSR Joǵarǵy Keńesiniń HII shaqyrylymynda júrgende boldy. Sózi nyq, oıy tereń, aıtaryn ári-sári etpeı, jerine jetkizip aıta biletin, jaı aıtpaı, shegelep aıtatyn, osy bir minezge baı, suńǵyla júrekti sheshen tildi kisimen ár kezdesken saıyn rýhanı baıyp, ómirtaný, qoǵamtaný, adamtaný deıtin jazýsyz qaǵıdanyń keńistigin aralap qaıtqandaı bolýshy edim... Talaı-talaı jıyndarda О́mekeńniń el taǵdyryn oń jolǵa bastar batyl-batyl usynystardy ornymen aıtyp, táýelsiz jurtymyzdyń damýyna aıanbaı ter tókken kezderiniń san kýási boldyq...
Ol taǵdyryn tórt túlik pen jerge baılaǵan, jańa zaman qalyptastyrǵan tehnologııa men ǵylymǵa bet burǵan qazaq esimdi keń minez eldiń adal perzenti retinde, urpaǵynyń, ultynyń mártebesin asqaq ustap, óz ustanymymen ómir súrdi, eńbek etti, ǵumyr keshti. О́mekeń alǵashqy Respýblıka Senatynyń tóraǵasy boldy. Alys-jaqyn sheteldermen baılanysty jolǵa qoıyp, ult parlamentiniń keń qanat jaıyp, ornyǵýyna zor úlesin qosty. Senatta júrip on alty jyl sabyrly minezi, salmaqty júrisi, dara bitimdi qalybymen zańgerlik bıliktiń pıramıdaldy tórine jarasar tuǵyrly tulǵa, aqylgóı aǵa, abyroıly sarapshy bola bildi... Senatta júrip, bozbala kezinen qııalyna qanat bitirip, kóńiline tynym bermegen el tarıhy men el ótkeni týraly tamyryn tereń-tereń ǵasyrlar qoınaýynan tartatyn tarıhqa degen qumarlyǵyn úzbeı, baıytýmen boldy.
Kemel basshy, halyq oıy men júrek qaǵysyn dál ustap otyrar memleketshil tulǵa retinde О́mekeń saıasat áleminde sózinen de, júrisinen de jańylmaı, táýelsiz Qazaq eliniń ıyǵyna artqan aýyr júgin qaıyspaı kótere bildi. Qýanysh Sultanovtyń sózimen aıtqanda, «Árqaısysy bir-bir marqasqa» qaǵıdatty máselege kelgende sheginýdi bilmeıtin О́zbekáli Jánibek, Ábish Kekilbaev, Sherhan Murtaza, Qarataı Turysov, Kenjeǵalı Saǵadıev, Marat Ospanov sekildi keshegi ult parlamentiniń kórki bolǵan, qazaqtyń óri men tórine jarasqan taǵy bir kesek bitimdi, ór minezdi, táýelsizdik dáýiri tusaýyn kesken iri tulǵamyz baqıǵa attanyp barady.
Baqul bolyńyz, elge tutqa bolǵan О́meke!
Qosh, aǵa!
Imanyńyz salamat bolsyn, óristi dáýirdiń órkendi tulǵasy!
Nurlan ORAZALIN,
Memlekettik syılyqtyń laýreaty