Bıyl qańtardyń ishindegi aıaz bolmasa jalpy qys Syr boıynda jyly boldy. Osydan da oblys epıdemıologteri erte oıanǵan túrli jándikterdiń, ásirese keneden keler qaýiptiń aldyn alýǵa qam jasap, josparly jumysqa kiristi. Jalpy óńir Kongo-Qyrym gemorragııalyq qyzbasynyń tabıǵı oshaǵynda ornalasqan.
Aqpan aıynda keneden keletin keseldiń aldyn alyp, sanıtarlyq-profılaktıkalyq is-sharalardy uıymdastyrýdy júıeleıtin oblys ákiminiń qaýlysy qabyldandy. Soǵan sáıkes kenege qarsy jumystardyń sapasy men tıimdiligin baqylaıtyn arnaıy jumys toptary qurylyp, aımaqtaǵy 115 qolaısyz eldi mekender tizbesi bekitildi. Olardyń arasynda Jańaqorǵan men Shıeli aýdanynda osyndaı aýyldar kóp bolyp tur.
«Jyl saıyn barlyq qolaısyz eldi mekende kenege qarsy óńdeý sharalary eki kezeń aıasynda júzege asyrylyp keledi. Bıyl bul jumys sáýir aıynyń alǵashqy onkúndiginde Shıeli, Jańaqorǵan aýdandarynan bastalady dep josparlanyp otyr», deıdi oblystyq sanıtarlyq-epıdemıologııalyq baqylaý departamentiniń basshysy Dınara Jańabergenova.
Mamandar byltyr oblys boıynsha epıdemıologııalyq ahýal qolaısyz bolǵanyn aıtady. Oblystyń 13 turǵyny Kongo-Qyrym dertine shaldyǵyp, onyń úsheýi kóz jumǵan. Al bıyl jyl basynan beri 7 adamdy kene shaǵyp, dárigerlerge júginipti.
Oblysta asa qaýipti aýrýǵa qarsy kúres jumystaryna qorǵanys qural jabdyqtar qory jetkilikti. Emdeý sharalaryna qajetti preparattar men qan qory da bar. Biraq eń durysy – mamandar aıtqan saqtyq sharalaryn ustanyp júrý.
Ulttyq saraptama ortalyǵynyń oblystyq fılıaly da keneden keler keseldiń jolyn kesýge úles qosady. Olardyń dereginshe bıyl aımaq boıynsha 4 928 gektar jerge zalalsyzdandyrý júrgiziledi.
«Búginde KQGQ-nyń tabıǵı oshaqtarynda entomologııalyq zertteý barysynda 3 myńnan astam kene jınalyp, 372 synama alyndy. Nátıjesinde, 4 synamadan oń nátıje anyqtalyp, juqpalyǵy 1,1 paıyz ekendigi anyqtaldy», deıdi Ulttyq saraptama ortalyǵy oblystyq fılıalynyń basshysy Farıda Qalıeva.
Qyzylorda