Bıyl qys qatty bolmasa da, qar qalyń tústi. Árıne, qardyń mol túskeni elge jaqsy. Egin bitik shyǵyp, jemshóp mol bolýǵa tıis. Alaıda naýryz aıynyń sońynan bastap, aýa raıy kúrt jylyp, asty muz qalyń qar birden eridi. Biraz eldi mekendi qarǵyn sý orap, keıbir aýyldardy shaıyp ketti. Qar sýynyń astynda qalǵan turǵyndar qaýipsiz aımaqtarǵa kóshirildi. Bul aıtýǵa ońaı bolǵanymen, osy jaǵdaıdy bastan ótkerip otyrǵan elge aýyr tıip otyr. Biraq tasqynnyń qaýpi áli de azaıǵan joq. Ásirese sońǵy kúnderi Aqtóbe, Aqmola, Atyraý, Ulytaý, Soltústik Qazaqstan, Qostanaı, Qaraǵandy, Pavlodar, Batys Qazaqstan oblystarynda jaǵdaı kúrdelene tústi.
Memleket basshysy senbi kúni sý tasqyny saldarynan qalyptasqan aýyr jaǵdaıǵa baılanysty úndeý jarııalady. Onda: «Qardyń kúrt erýine baılanysty aımaqtarda sý tasqyny bolyp jatyr. Bul – tabıǵı apat. Mundaı ahýal uzaq jyldan beri bolmaǵan. Bul kólemi jaǵynan keıingi 80 jyldan bergi eń iri tabıǵı apat deýge bolady. Atqarýshy organdar jibergen olqylyqtardy túzeý úshin men shuǵyl túrde naqty tapsyrmalardy berdim. Qazir barlyq qajetti shara qabyldanyp jatyr. Úkimet qarǵyn sýdyń saldaryn joıýǵa bar kúshin salyp jatyr», dedi. Sondaı-aq Prezıdent úndeýinde tasqyn sýdan zardap shekken azamattardy memleket eskerýsiz qaldyrmaıtynyn aıtty. Materıaldyq shyǵyndar tolyq óteletinin jetkizdi. Qasym-Jomart Toqaev Batys Qazaqstan oblysyna jumys saparymen baryp, qarǵyn sý basqan aýmaqtardy tikushaqpen aralap, evakýasııalanǵan turǵyndarmen kezdesti.
Shynynda, bul – tabıǵı apat. Tabıǵatqa eshkim qarsy tura almaıdy. Degenmen tıisti mekemeler tasqyn sýdyń aldyn alý sharalaryna jaýapkershilikpen qaraýy kerek edi. Bolar is boldy. Qazir Premer-mınıstrdiń basshylyǵymen respýblıkalyq shtab quryldy. Úkimet basshysy, onyń orynbasarlary, quzyretti organdardyń ókilderi apat bolǵan aımaqtardy aralap júrgenin bilemiz. Sý tasqynymen kúresýge elimizdiń materıaldyq qorynan qajetti resýrstar tartylyp otyr.
Ár ýaqytta qaısar halqymyz qıyndyqty birigip jeńgen. Bárimiz bir adamdaı tasqynnyń betin qaıtarýǵa jumylaıyq. Sabyrlyq saqtap, daýryqpa sózge ermeıik. Árkim óz qolynan kelgen isti atqarsyn. «Jumyla kótergen júk jeńil», deıdi. Birigeıik, bir bolaıyq!
Jánibek Káribjanov,
memleket jáne qoǵam qaıratkeri