Osy kúnderi Petropavl qalasyndaǵy A.Vınokýrov atyndaǵy sport saraıynda 13–15, 18–20 jas aralyǵyndaǵy jasóspirimder men jastar arasynda grek-rım jáne erkin kúresten respýblıka chempıonaty ótip jatyr. Buǵan elimizdiń Astana, Almaty, Shymkent sııaqty respýblıkalyq dárejedegi qalalarymen qatar 17 oblystan barlyǵy 11 salmaq boıynsha 700 sportshy keldi. Sonyń ishinde Soltústik Qazaqstan oblysynyń namysyn 101 palýan qorǵaıdy.
Teristik komandasynyń ishinde 31 palýan erkin kúresten, 42 palýan grek-rım jáne 28 qyz áıelder kúresinen qatysady. Grek-rım kúresinen Qazaqstannyń qurmetti sport sheberi Jambyl Tasemenovtiń aıtýyna qaraǵanda, barlyq sportshynyń daıyndyǵy joǵary. «Shıyrshyq atqan jastardyń kúres sheberligi de joǵary bolar dep oılaımyn. Uzaq ýaqyt jaqsy daıyndyqtan ótkenderi kórinip tur», dedi ol.
Alaıda «Kúsh atasyn tanymas» degendeı, soltústikqazaqstandyq sportshylar joǵary kórsetkishterge ázirshe jete almaı jatyr. Oblys jattyqtyrýshylarynyń úmiti bolǵan Ýálıhanov aýdanynyń ortalyǵy Kishkenekól aýlynan kelgen erkin kúres ókili Asyl Erejepov ekinshi kúngi kúreste tek besinshi orynǵa ǵana taban tiredi.
«Bulardyń birazy – Azııa oıyndary men Azııa chempıonattarynyń júldegerleri. Sondyqtan chempıonat óte tartysty ótip jatyr. Tipti qyzdar arasynan da kúrestiń kúrdeli tásilderin tereń meńgergender kórinip qalady», dedi Aqtóbe qalasynan kelgen halyqaralyq dárejedegi tóreshi Berik Shalabaev.
Túrkistan oblysynan kelgen Dáýlet Qýanyshbekti áńgime tartqanymyzda, ol óziniń barlyq beldesýge de qushtarlyqpen shyqqanyn jetkizdi.
«Men 52 kg salmaq dárejesinde kúresemin. Kúrespen aınalysqanyma 10 jyldaı boldy. Biraq búgingi fınalda kezdesken Almaty oblysynan kelgen qarsylasym daıyndyǵymnyń áli de tómen ekenin kórsetip, meni utyp ketti. Sonymen 3-orynmen qanaǵattandym», dedi ol.
Osy chempıonatta jeńip shyqqandar Ispanııadaǵy álem chempıonatyna qatysýǵa joldama alady. Chempıon bolǵandardyń kóbi «Qazaqstannyń sport sheberi» normatıvin de oryndaıdy.
PETROPAVL